Maíspá Siggu Kling – Bogmaður: Hrífur með þér einhverja sérstaka manneskju

Elsku Bogmaðurinn minn. Það er búið að vera töluvert mikið álag á þér undanfarið og Satúrnus er aðeins búinn að vera að pota í þig en við vitum það bæði að það þarf nú meira en smá pot til þess að slá þig út af laginu.

Það er mikilvægt fyrir þig að sjá að það má alveg skipta um skoðun og það mun breyta svo mörgu fyrir þig næstu vikurnar að gera akkúrat það, hafðu það í huga.

Þú ert með svo stórt hjarta og vilt öllum svo vel en það getur stundum misskilist og hvað með það?

Þú þarft að tileinka þér á næstunni að vera ekki að láta utanaðkomandi hafa of mikil áhrif á þig. Þú þarft að skoða að flutningar eða breytingar á verkefnum eða vinnu eru í kortunum þínum.

Það er mikið að gerast í kringum þig og þú þarft að hafa fyrir því en uppskeran er handan við hornið. Mín skilaboð eru: Af auðveldu verður ekki neitt. Og þú átt eftir að taka á hlutunum í kringum þig af svo miklum móð að þú verður hreinlega hissa.

Þú skalt steinhætta að vera strangur við sjálfan þig og gefðu þér frekar aðeins lausan tauminn. Það er ekkert fallegra en afslappaður bogmaður stútfullur af sjálfstrausti! Níu til fimm vinna hentar þér nú ekki alltaf elskan mín og þú þarft að finna þinn farveg í vinnu eða skóla sem hentar þér best.

Þú átt eftir að nýta þér betur þetta dásamlega ímyndunarafl sem þú hefur og hrífa með þér einhverja sérstaka manneskju sem mun breyta lífi þínu.

Þér finnst um stund allt vera eitthvað svo erfitt en það er bara til að sýna þér nýjar leiðir. Þú ert ekki að ráða alla lífsgátuna núna en þú verður ánægður með breytinguna sem siglir til þín og léttirinn gerir vart við sig.

Þú verður eitthvað svo kraftmikill í trygglyndi þínu og skilur alls ekki hvernig fólk getur verið svikult. Öll svik virðast komast upp á yfirborðið og þá verður auðveldara fyrir þig að taka nýjar ákvarðanir.

Skoðaðu það að vera þolinmóður og fyrirgefa öðrum og bíta ekki í þig einhverja þrjósku sem í raun og veru lætur þér líða verr en þér þarf að líða.

Þú ert bara svo tær og góð manneskja og kemst alveg ótrúlega langt á þeirri orku.

Lífið er ótrúlegt, þín Sigga Kling

Frægir bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collecton, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur, Hemmi, hársnillingur á Módus, Lovísa, hönnuður hjá Kjólar og konfekt.