Skip HB Granda víkja úr höfninni á Akranesi fyrir tökuliði Fast 8

Uppsjávarskipum HB Granda, Venusi NS og Víkingi AK, var siglt frá Akranesi til hafnar í Reykjavík til að rýma fyrir tökuliði Fast 8 – en skipin hafa legið við bryggju á Akranesi frá því að loðnuvertíð lauk.

Akraneshöfn og Sementsverksmiðjan í bænum eru þeir tökustaðir sem taka við af rómuðu umhverfi Mývatns þar sem tökum er lokið.

Að sögn Karls Sigurjónssonar, skipaeftirlitsmanns HB Granda á Akranesi, í frétt á heimasíðu fyrirtækisins, hefur hann verið í sambandi við forsvarsmenn True North, sem hefur haft veg og vanda af undirbúningi vegna töku myndarinnar hérlendis frá því um miðjan desember.

Áður en haft var samband við HB Granda vegna skipanna í höfninni var True North búið að setja sig í samband við bæjarstjórann á Akranesi vegna töku myndarinnar í byggingu Sementsverksmiðjunnar. Þá verða upptökur einnig á hafnarsvæðinu. Þær hefjast 14. apríl og eiga að taka tvo daga. Síðan eru aðrir tveir dagar ætlaðir fyrir tökur í Hvalfirði, segir Karl, en að hans sögn voru Venus og Víkingur einfaldlega of stór skip fyrir leikmyndina á hafnarsvæðinu og þurftu því að víkja.

Fyrst var rætt um að Lundey NS, sem liggur í höfninni, viki einnig en sú ósk var síðan dregin til baka. Bjarni Ólafsson AK er einnig í höfninni en hann virðist ekki vera fyrir kvikmyndagerðarmönnunum, segir Karl.

Alls munu um 300 manns koma að upptöku Fast 8 á Akranesi og því má búast við að bæjarbragurinn breytist verulega eftir rúma viku, segir í fréttinni.

Þessi grein birtist fyrst í Fréttablaðinu þann 11. apríl.