Cowell vill aftur gamla gengið

Simon Cowell vill fá Louis Walsh og Sharon Osbourne til að setjast aftur í dómarasætin í raunveruleikaþáttunum X-Factor UK.

Þessi 56 ára raunveruleikastjarna bauð þeim báðum í matarboð á dögunum til að sannfæra þau um að mæta aftur til leiks.

„Simon og Sharon hafa aldrei náð vel saman og hafa oft sagt opinberlega að þau muni aldrei aftur vinna saman. Simon virðist vera búinn að taka hana í sátt og vill hann ólmur fá upphaflega dómaragengið aftur saman,“segir heimildarmaður The Sun.

Þættirnir fengu ekki mikið áhorf í vetur og hefur hann aldrei mælst með minna áhorf síðan X-Factor hóf göngu sína. Cheryl Fernandez-Versini og Nick Grimshaw eru bæði hætt sem dómarar í þáttunum.