Æfðu viðbrögð við stórslysi

Landhelgisgæslan og Samtök útgerða skemmtiferðaskipa í norðurhöfum stóðu í síðustu viku fyrir svokallaðri skrifborðsæfingu og ráðstefnu um leitar- og björgunaraðgerðir á norðurslóðum. Fulltrúar leitar- og björgunaraðila og útgerða skemmtiferðaskipa voru frá flestum Norðurlandanna, Bandaríkjunum og Kanada.

Tilgangur æfingarinnar var að skiptast á upplýsingum og reynslu, en sjóslys á norðurslóðum reynir mjög á getu björgunaraðila og getur haft alvarlegar afleiðingar fyrir lífríki og umhverfi á hafsvæðinu og er erfitt viðureignar vegna fjarlægðar og langs viðbragðstíma.

Ragnhildur Hjaltadóttir, ráðuneytisstjóri innanríkisráðuneytis, flutti ávarp í fjarveru Ólafar Nordal, innanríkisáðherra. Hún sagði mikilvægt að þessir aðilar þekktu sem gerst starfsemi og aðstæður í norðurhöfum og Landhelgisgæsluna og sagði jafnframt systurstofnanir hennar í nágrannaríkjum gegna þýðingarmiklu hlutverki. Sagði hún íslensk stjórnvöld hafa tekið þátt í viðræðum um að koma á björgunarmiðstöð á norðurslóðum sem hefði einkum það hlutverk að bregðast við vá á þeim slóðum. Því væri lykilatriði að setja upp viðbragðs­áætlun og koma saman til að æfa slíka áætlun.

Æfð voru viðbrögð við atburði þegar upp kemur eldur í vélarrúmi skips með tæplega 400 manns innanborðs þegar það er statt við Jan Mayen á leið frá Íslandi til Svalbarða.

Fram kom að æfing og samhæfing sem þessi hefur ekki verið haldin áður og í sumar er ráðgert að Landhelgisgæslan æfi aðgerðir með áhöfnum nokkurra útgerða sem senda munu skip sín á norðurslóðir.

Fréttin birtist fyrst í Fréttablaðinu 18. apríl.