Kannast ekki við að Sigmundur Davíð hafi starfrækt greiningardeild í forsætisráðuneytinu

Leiðari Sigurjóns M. Egilssonar á Sprengisandi á Bylgjunni í morgun hefur vakið nokkra athygli.

Í leiðaranum greindi Sigurjón frá greiningardeild sem hann segir að hafi verið starfrækt í forsætisráðuneytinu í tíð Sigmundar Davíðs Gunnlaugssonar sem flokkaði það sem Sigurjón og aðrir sögðu og skrifuðu. Þáverandi aðstoðarmaður Sigmundar kannast ekki við slíka greiningardeild.

„Ráðherrann fyrrverandi hafði greiningardeild í sínu ráðuneyti. Sú greiningardeild vann ekki við það að greina afleiðingar þess að fólk eins og hann léki ekki með, ekki af fullri alvöru, í baráttu Íslendinga til endurreisnar eftir afleiðingar af starfi ömurlegra stjórnmálamanna á árunum fyrir hrun. Nei, sú greiningardeild dundaði sér við að flokka niður það sem ég sagði og skrifaði sem og ýmsir aðrir. Þetta veit ég frá fyrstu hendi. Ég var kallaður á teppið,“ sagði Sigurjón í leiðaranum.

Honum hafi svo verið tilkynnt að niðurstaðan úr greiningunni væri sú að hann gerði ríkisstjórn Sigmundar Davíðs erfitt fyrir og væri henni til trafala. Þá hafði hann samkvæmt greiningunni oftast verið vondur við Framsóknarflokkinn.

Vísir hafði samband við Jóhannes Þór Skúlason sem var aðstoðarmaður Sigmundar Davíðs og spurði hann út í greiningardeildina sem Sigurjón talaði um og þá fullyrðingu hans að hann hefði verið kallaður á teppið í forsætisráðuneytinu.

Jóhannes vildi lítið tjá sig um málið en sagðist þó ekki kannast við að starfrækt hafi verið sérstök greiningardeild í forsætisráðuneytinu sem hefði það hlutverk að greina Sigurjón M. Egilsson eða aðra fjölmiðlamenn.

Hlusta má á leiðara Sigurjóns M. Egilssonar í spilaranum hér að neðan.