San Antonio vann og setti félagsmet | Myndbönd

Fimm leikir fóru fram í NBA-deildinni í körfubolta í nótt.

San Antonio Spurs setti félagsmet þegar liðið vann sjö stiga sigur, 102-95, á Toronto Raptors á heimavelli.

Þetta var 64. sigur San Antonio í vetur en áður hafði liðið mest unnið 63 leiki á einu tímabili (2005-06). Þetta var jafnframt 48. sigur San Antonio á heimavelli í röð.

Kawhi Leonard skoraði 33 stig fyrir San Antonio, sem er það mesta sem hann hefur gert á ferlinum, og LaMarcus Aldridge skilaði 31 stigi og 15 fráköstum.

Sex leikmenn Toronto skoruðu 10 stig eða meira í leiknum. Norman Powell var þeirra stigahæstur með 17 stig.

Detroit Pistons gerði góða ferð til Chicago og vann fjögurra stiga sigur, 90-94, á heimamönnum.

Reggie Jackson skoraði 22 stig fyrir Detroit sem er í 7. sæti Austurdeildarinnar.

Jimmy Butler var með þrennu (28 stig, 17 fráköst og 12 stoðsendingar) í liði Chicago en það dugði ekki til sigurs. Liðið er í 9. sæti Austurdeildarinnar og þarf góðan endasprett til að komast í úrslitakeppnina.

Þá vann Portland Trail Blazers góðan sigur á Miami Heat, 110-93. CJ McCollum skoraði 24 stig fyrir Portland en Hassan Whiteside var atkvæðamestur hjá Miami með 20 stig og 13 fráköst.

Úrslitin í nótt:

San Antonio 102-95 Toronto

Chicago 90-94 Detroit

Portland 110-93 Miami

Philadelphia 102-115 Indiana

Denver 106-115 Sacramento

Kawhi Leonard átti stórleik Jimmy Butler var heitur Flottustu tilþrif næturinnar