Tvöfalda framlagið til framleiðslu á íslensku sjónvarpsefni

Í nýjum þjónustusamningi RÚV og mennta- og menningarmálaráðherra kemur fram að tvöfaldað verður framlag til leikins efnis til að stuðla að eflingu kvikmyndagerðar í landinu. Markmiðið er að auka framboð og gæði á íslensku leiknu sjónvarpsefni.

Samningurinn var undirritaður í gær og í honum er kveðið nánar á um markmið, hlutverk, skyldur og umfang þeirrar þjónustu sem RÚV ber að veita samkvæmt lögum.

Einnig er kveðið á um fjármögnun starfseminnar og er forsenda samningsins að innheimt útvarpsgjald lækki ekki út samningstímann.

Forgangsraðað verður í þágu íslensks og norræns efnis, auk menningarefnis og haldið verður áfram að efla þjónustu við börn og ungmenni. Þar að auki verður starfsemi RÚV á landsbyggðinni tryggð. 

Fréttin birtist fyrst í Fréttablaðinu 6. apríl.