Forsætisráðherra sendir samúðarkveðjur

Sigmundur Davíð Gunnlaugsson, forsætisráðherra, hefur sent Charles Michel, forsætisráðherra Belgíu, samúðarkveðjur frá ríkisstjórninni og íslensku þjóðinni vegna hryðjuverkaárásanna í Brussel í morgun. Frá þessu er greint á vef ráðuneytisins.

„Þessir skelfilegu atburðir eru mikið áfall en með þeim er enn á ný vegið að grundvallargildum og lífsháttum hins lýðræðislega samfélags. Hugur minn er hjá þeim sem eiga um sárt að binda í kjölfar atburðanna og belgísku þjóðinni.“

34 eru látnir og á annað hundrað slasaðir eftir voðaverkin í morgun. Hryðjuverkasamtökin Íslamska ríkið hefur lýst yfir ábyrgð á árásunum.