Vísbendingar um að starfsnám sé misnotað

Ingvar Haraldsson skrifar 23. mars 2016 10:00

Alda Hrönn Jóhannsdóttir segir að passa verði að starfsnám laganema sé ekki misnotað. fréttablaðið/ernir

Mun fleiri laganemar eru hér á landi á hvern íbúa en á Norðurlöndunum. Þetta kom fram í máli Öldu Hrannar Jóhannsdóttur, formanns Stéttarfélags lögfræðinga og aðallögfræðings lögreglunnar á höfuðborgarsvæðinu, á málþingi um hvort fyrirtæki og stofnanir væru að misnota aðstöðu laganema í gær.

Þetta hafi meðal annars í för með sér að það sé erfiðara fyrir nýútskrifaða lögfræðinga að fá vinnu við hæfi að sögn Öldu. Á Íslandi eru 2.477 íbúar á hvern útskrifaðan laganema miðað við 12 þúsund í Finnlandi og 8.455 í Svíþjóð og 6.250 í Noregi samkvæmt samantekt Öldu.

Hún bendir á að ein afleiðing þess sé að fleiri aðilar bjóði nú upp á starfsnám fyrir laganema en áður. „Það hafa verið ákveðnar vísbendingar um að verið sé að taka af stöður og manna þær með svona námsvistun. Því þá eru þetta aukahendur sem kosta ekki neitt,“ segir Alda.

Alda segir stéttarfélag lögmanna og BHM vera hlynnt starfsnámi að því gefnu að um starfsnám sé að ræða. „En ekki að þetta sé fjögurra vikna vinna með skilgreiningu um að þú eigir að vera sjálfstæð í starfi.“

BHM gagnrýndi auglýsingu Wow air þar sem auglýst var eftir manneskjum með BA próf í lögfræði í ólaunað starfsnám.

„Við þurfum að gæta að því að ekki sé verið að misnota þetta.“ Alda nefnir sem dæmi auglýsingu Wow air sem BHM gerði athugasemd við og nýlegar auglýsingar nemendafélaga laganema eftir starfsnemum. „Í öllum tilfellum er um að ræða útskrifaða BA-nema. Þetta er fólk með háskólagráðu þótt það sé ekki komið mastersgráðu,“ segir Alda.

Hún segir það ekki eiga að vera í höndum forstjóra eða forstöðumanna viðkomandi fyrirtækja eða stofnana að útfæra starfsnámið líkt og tilfellið hafi verið í fyrrgreindum auglýsingum heldur eigi að vera í höndum skólanna að skilgreina í hverju námið felist.

„Í hverju felst námið, ef skólinn hefur ekkert með námið að gera?“ segir Alda. „Ef þú ert í námsvist áttu að læra ákveðin vinnubrögð, og þá að vera fyrir fram skilgreint hvað þú átt að læra í námsvistinni. Átt þú að læra að gera greinargerðir, stefnur eða læra hvernig verklagið eða verkferlar eru? Þú átt ekki bara að vera sjálfstæður í vinnubrögðum og nýttur sem einn af starfsmönnunum,“ segir Alda.