Tæki­færi í vátryggingakerfi til að draga úr verð­bólgu

Stjórn Neytendasamtakanna gaf á dögunum út skýrslu um vátryggingamarkaðinn á Íslandi en þar er tryggingamarkaðurinn hér á landi borinn saman við markaðinn á Norðurlöndum.

„Það kannski kom engum á óvart en tryggingar eru dýrar á Íslandi en það sem kom á óvart er að það er tiltölulega lítil arðsemi, og stundum engin, af ökutækjatryggingum en mikil arðsemi af líf- og sjúkdómatryggingum,“ segir Breki Karlsson, formaður Neytendasamtakanna.

Hann telur kerfið hér á landi með þeim hætti að almenningur eigi erfitt með að átta sig á því hvað sé tryggt og hvað ekki auk þess sem verulega skorti á þá samhæfingu sem finna megi á Norðurlöndunum. Fulltrúar Neytendasamtakanna hafa lagt fram tillögur til úrbóta í sjö liðum sem miða að verulegri lækkun iðgjalda.

„Og þar með koma til lækkunar á vísitölu neysluverðs og þar með verðbólgu um 0,2 til 0,3 prósentustig.“

Tækifæri til einföldunar

Vátryggingakerfið hér á landi sé óþarflega flókið og tækifæri til einföldunar.

„Ekki einungis munu iðgjöld lækka sem yrði heimilum mikil búbót, heldur vega tryggingar um eitt prósent í vísitölu neysluverðs og þar með myndi lækkun á iðgjöldum draga úr verðbólgu.“

Tryggja þurfi þó að þær úrbætur sem samtökin leggja til skili sér sannarlega til neytenda. Á næstu vikum munu fulltrúar Neytendasamtakanna kynna tillögurnar fyrir ráðherrum ríkisstjórnarinnar.

„Við vonum að það verði farið að þessum tillögum. Þetta er okkar framlag í baráttunni bæði gegn verðbólgu en líka gegn sanngjarnara og einfaldara kerfi,“ sagði Breki Karlsson, formaður Neytendasamtakanna en tillögurnar má nálgast á vef samtakanna.