Hjólaði upp kirkjutröppurnar eftir að hafa sporðrennt súkkulaðiköku

„Ég gerði tilraun til þessa jólin 2014 en það gekk ekki upp þá. Núna fór ég hins vegar alla leið,“ segir Bergur Benediktsson í samtali við Vísi. Í dag tók hann sig til og hjólaði upp kirkjutröppurnar á Akureyri.

Hjólið sem notað var til verksins var svokallað „fat-bike“ en dekkin á þeim eru umtalsvert breiðari en á venjulegu hjóli. Bergur lýsir hjólunum sem nokkurskonar skriðdrekaútgáfu af reiðhjóli. „Þau eru hönnuð fyrir snjó, sand og torfærur.“

Um tilraunina fyrir rúmlega ári segir Bergur að hann hafi þá verið nýkominn á svona hjól og ekki almennilega verið búinn að læra á það. Hann hafi þá verið með stífan gaffal en sé nú kominn með sérhannaðan fjaðurgaffal sem geri gæfumuninn.

„Þetta tók svona sjö til átta tilraunnir. Fyrst um sinn gleymdi ég að anda og síðan urðu dekkin drullug og ég byrjaði að spóla. Ég settist því niður á kaffihúsi og fékk mér súkkulaðiköku og kaffi. Eftir það þá flaug ég upp alla leið,“ segir Bergur.

Bergur veit ekki til þess að einhverjir aðrir hafi hjólað alla þessa leið áður en útilokar það ekki. „Ég hef ekki enn komist í ritaðar heimildir sem sýna fram á annað,“ segir hann að lokum. Myndbandið af ferðinni þar sem allt gekk upp má sjá hér fyrir neðan.

Stairway to heaven. Það er búið að blunda í mér lengi að hjóla upp kirkjutröppurnar á Akureyri. Það tókst eftir nokkrar tilraunir í dag. Takk Sara Ben fyrir frábært pepp og myndatöku! Lauf Forks Fatback Bikes Garmin Búðin ZO-ON ICELAND

Posted by Bergur Benediktsson on Thursday, 24 March 2016