Sádí-arabískir prinsar hverfa sporlaust

Talið er að sádí-arabíski prinsinn Sultan bin Turki hafi verið fluttur til Sádí-Arabíu frá Evrópu gegn vilja sínum. Hvorki tangur né tetur hefur sést af honum frá 1. febrúar síðastliðnum og bætist hann í hóp sádí-arabískra prinsa sem hafa horfið sporlaust að undanförnu.

Bin Turki hefur staðið í málaferlum við sádí-arabísk stjórnvöld að undanförnu en málið má rekja allt til ársins 2003. Þá var honum rænt, af því er virðist af téðum stjórnvöldum, og hefur hann þurft að kljást við margvísleg andleg- og líkamleg mein allar götur síðan.

The Guardian rekur sögu prinsins í dag. Í frétt miðilsins segir að þann 1. febrúar hafi Sultan bin turki og fylgdarmenn hans stigið upp í flugvél í París sem fljúga átti til Kaíró í Egyptalandi. Þar ætlaði hann að heimsækja vini sína og föður, sem er eldri bróðir núverandi konungs Sádí-Arabíu og hafði verið gengið frá hótelgistingu fyrir hópinn í egypsku höfuðborginni. Þangað rataði hópurinn hins vegar aldrei.

„Það var flugvél frá Sádí-Arabíu sem ætlaði að fljúga til Kaíró en þangað flaug hún aldrei,“ sagði einn aðstandenda prinsins sem var með honum í París í samtali við Guardian. „Sádí-arabíski fáninn prýddi vélina. Þetta var flugvél frá konungsríkinu.“

Þriðji prinsinn sem ekkert spyrst til

Vinur prinsins sem beið hans í Kaíró sagði að hann hafi gantast með að komast ekki á leiðarenda. „Í síðasta símtali okkar sagði hann hlæjandi: „Ég mun fljúga til Kaíró í vikunni með konunglegri flugvél. Ef þú finnur mig ekki hafa þeir flutt mig til Riyadh, reyndu að gera eitthvað.“

Sultan prins er þriðji sádí-arabíski prinsinn sem virðist hafa horfið af yfirborði jarðar á síðastliðnu ári.

Hinir tveir, prinsarnir Turki bin Bandar bin Mohammed bin Abdurahman al-Saud og Saud bin Saif al-Nasr bin Saud bin Abdulaziz al-Saud voru einnig áberandi gagnrýnendur sádí-arabískra yfirvalda áður en þeir hurfu.

Ekkert hefur spurst til þess fyrrnefnda allt frá því að hann fór í viðskiptaferð til Marokkó í júlí í fyrra. Grunsemdir fóru að vakna um stöðu bin Abdulaziz al-Saul þegar hann hætti skyndilega að uppfæra Twitter-síðu sína í september á síðasta ári.