Sýndi Söru „ekki eðlilega tillitsemi eða háttvísi“

Ólafía B. Rafnsdóttir, formaður VR, sýndi Söru Lind Guðbergsdóttur ekki eðlilega tillitsemi eða háttvísi í starfi sínu þær níu vikur sem þær unnu saman. Þetta kemur fram í dómi Hæstaréttar sem kveðinn var upp í dag þar sem VR var sýknað af kröfu Söru Lindar um miskabætur. Vísir greindi frá dómnum fyrr í dag.

Sálfræðingarnir sem skoðuðu samskipti Ólafíu og Söru töldu ekki neikvæða eða niðurlægjandi hegðun af hálfu formannsins að leita framhjá henni og til undirmanns enda var sá reynslumikill.

Aftur á móti var komist að þeirri niðurstöðu að formaðurinn hefði átt að útskýra þetta fyrir áfrýjanda og ámælisvert væri að verða ekki við óskum áfrýjanda um að ræða stöðu hennar. Einnig var fundið að því að áfrýjandi hefði á fundi með trúnaðarmönnum, trúnaðarráði og starfsfólki félagsins um kjaramál, sem heyrðu undir ábyrgðarsvið áfrýjanda, hvorki haft hlutverk né verið höfð með í ráðum.

Þá var talið aðfinnsluvert að formaðurinn hefði án gildrar ástæðu sniðgengið óskir áfrýjanda um frekara samráð, en þessi framkoma gæti ekki talist harkaleg, gróf eða verulega ógnandi, þótt hún hefði verið viðvarandi.

Ávirðingarnar í garð Ólafíu voru þó ekki taldar það alvarlegar eða þess eðlis að þær vörðuðu miskabótaábyrgð.

Einn dómari af þremur taldi Söru eiga rétt á bótum

Ólafur Börkur Þorvaldsson, einn þriggja dómara í málinu, skilaði sératkvæði í málinu. Hann tekur undir með hinum dómurunum tveimur að uppsögnin hafi verið lögmæt en telur aftur á móti að Sara Lind hafi orðið fyrir miska.

Vísar Ólafur Börkur til skýrslna tveggja sálfræðinga þar sem hegðun Ólafíu var metin annars vegar ámælisverð og hins vegar aðfinnsluverð og viðvarandi. Í því sambandi yrði að telja að Ólafía hefði sýnt af sér verulegt gáleysi sem formaður stéttarfélags.

Taldi hann að Sara Lind hefði því átt rétt á bótum. Auk þess hefði VR átt að greiða málskostnað Söru Lindar.

Dóm Hæstaréttar í heild sinni má lesa hér.