Kattaflóin langstökkvari sem dreifir sér um húsið

Kattaflóin sem nú hefur verið verið að gera vart við sig stekkur langt, er snögg í hreyfingum og lifir allt árið um kring, segir Þóra Jónasdóttir, dýralæknir hjá Matvælastofnun. Hún segir samstillt átak hunda- og kattaeigenda nauðsynlegt svo hægt verði að vinna bug á þessari óværu.

„Hún fjölgar sér, verpir eggjum á feldinn sem svo detta af, hún festir þau ekki í hárin, og dreifir sér oft um húsið, í sófa og teppi og annað slíkt í kringum bælið þeirra. Þar klekjast þau út yfirleitt á innan við þremur vikum við herbergishita. Svo sýkjast náttúrulega ný dýr,“ segir Þóra í Reykjavík síðdegis.

Fyrst varð vart við þessa óværu í febrúar þegar greindist kattafló á ketti í Garðabæ en þessi tegund flóa hefur örsjaldan fundist hér á landi. Nú er um að ræða kött af heimili í miðborg Reykjavíkur, sem fer út að vild og telur Matvælastofnun að hugsanlega sé kattaflóin orðin útbreidd meðal katta, og ef til vill hunda.

Flóin er meðhöndluð með sérstökum lyfjum sem fást hjá dýralæknum, að sögn Þóru. „Svo er mjög mikilvægt með flóna að það verður að taka umhverfið með eggjunum og lirfunum og þrífa vel, ryksuga og þvo allt sem hægt er að þvo. Kattaflóin er þannig að eggin og lirfurnar lifa ekki í kulda, þannig að undir þremur gráðum lifir hún ekki lengi. Þess vegna væri gott tækifæri núna, yfir veturinn, að það er hægt að bera út húsgögn eða teppi og frysta ef það er eitthvað sem maður getur ekki þvegið,“ segir hún.

Þá segir hún oft erfitt að sjá flóna. „Oft er auðveldara að sjá saurinn sem er svona eins og það sé smá pipar í feldinum. Hún er dökkbrún og saurinn er dökkur, svartur. Ef maður setur það á pappír og bleytir þá virkar það svolítið rauðbrúnt því það getur verið smá blóð í þessu. Flóin er vel sjáanleg með beru auga en vandamálið er að hún ferðast mjög hratt,“ segir Þóra og bætir við að gott sé að nota stækkunargler. „En svo erum við  núna að reyna nýjar leiðir hvort við getum ryksugað inn sýni.“

Hlusta má á viðtalið í heild í spilaranum hér fyrir neðan.