Undrast afstöðu sveitarstjórnar til frumvarps

„Mér kemur mjög á óvart ef sveitarfélag sér ekki fyrir sér að því verði tryggður með lögum tekjustofn til þess að mæta straum af uppbyggingu á ferðamannastöðum,“ segir Róbert Marshall um gagnrýni sveitarstjórnar Bláskógabyggðar á frumvarp þingmanna Bjartrar framtíðar varðandi uppbyggingu á ferðamannastöðum.

„Með þessu frumvarpi er verið að reyna með einfaldari hætti heldur en hingað til hefur verið gert að búa til möguleikann á því að bregðast við ástandinu,“ segir Róbert.

Í bókun sinni, sem Fréttablaðið sagði frá í gær, kallar sveitarstjórn Bláskógabyggðar eftir lausn á landsvísu fremur en að hvert sveitarfélag fái vald til að veita leyfi til gjaldtöku vegna nýtingar ferðamannastaða. Það auki flækjustig og mismuni sveitarfélögum.

„Ég er algerlega ósammála þessu. Auðvitað yrði þetta bara á ferðamannastöðum þar sem er ástæða til þess að vera með uppbyggingu,“ segir Róbert og minnir á mikla fjölgun ferðamanna á síðustu árum og spár um 40 prósent fjölgun á þessu ári. „Ég myndi halda að það kallaði á ígildi neyðaráætlunar ef menn ætla að bregðast við með almennilegum hætti á mörgum stöðum.“

Þá segir Róbert ekki útlit fyrir að málið leysist á landsvísu. „Því miður hefur verkefnið verið ofviða núverandi ríkisstjórn og ráðherra iðnaðar- og viðskiptamála. Þau hafa ekki ráðið við þetta og frumvarpið er tilraun til þess að búa til lagaramma sem gerir sveitarfélögunum kleift að mæta ástandinu.“