Karlkyns útvarpsmenn í meirihluta í Reykjavík

Karlkyns þáttastjórnendur eru í meirihluta hjá nær öllum þeim útvarpsstöðvum sem könnun mannréttindaskrifstofu Reykjavíkurborgar um kynjahlutföll í útvarpi tók til. Niðurstöður könnunarinnar voru birtar í bæklingnum Kynlegar tölur sem borgin gaf út í gær.

Vísir hefur áður fjallað um könnunina, en í niðurstöðum hennar kemur fram að karlkyns þáttastjórnendur eru í meirihluta hjá helstu útvarpsstöðvum og hlaðvörpum í Reykjavík, 133 gegn 74 konum.

Karlmenn eru í meirihluta fastra þáttastjórnenda hjá Rás 2, X-inu, Bylgjunni, FM957, Útvarpi Sögu, hlaðvarpi Kjarnans, Lindarinnar, Alvarpsins og FM XTRA. Konur eru þó í meirihluta hjá Rás 1, 25 gegn sautján.

Þetta er í sjötta sinn sem mannréttindaskrifstofa Reykjavíkurborgar gefur út bæklinginn Kynlegar tölur á alþjóðlegum baráttudegi kvenna. Tölfræðilegum upplýsingum í bæklingnum er ætlað að varpa ljósi á ólíka stöðu karla og kvenna eins og hún birtist á ýmsan hátt í borginni og á landinu.

Í bæklingnum, sem finna má í viðhengi við fréttina, kemur einnig fram að formenn allra hverfisíþróttafélaga Reykjavíkur eru karlkyns og mikill meirihluti strætisvagnastjóra hjá Strætó, 220 gegn sextán konum, sömuleiðis.

Þá er einnig fjallað um morð á Íslandi á árunum 1980 til 2015. 56 morð voru framin á tímabilinu, svo vitað sé, og voru þar af fjörutíu karlar myrtir og sextán konur. Þegar horft er til kvenna sem myrtar voru á tímabilinu, voru ellefu af sextán morðum (69 prósent) heimilisofbeldismál en ellefu af fjörutíu morðum á körlum (28 prósent).