Bryndís Fanney Harðardóttir, sem er í svæðisstjórn björgunarsveitanna og í björgunarsveitinni Víkverja, segir erfitt að segja hvað meira sé hægt að gera til að koma í veg fyrir alvarleg slys í Reynisfjöru, en erlendur ferðamaður lést í fjörunni í morgun.

Maðurinn var í heimsókn hér á landi ásamt eiginkonu sinni en hann sogaðist út með öldunni og var látinn þegar björgunarmenn náðu til hans á báti. Banaslys varð í fjörunni árið 2007 og síðan hafa fjölmargir komist í stórhættu en sloppið með skrekkinn.

Að sögn Bryndísar er stórt og áberandi skilti á göngustíg sem liggur að fjörunni og varar það við hættunni sem þar getur leynst.

„Þetta var tekið til endurskoðunar fyrir tveimur árum og nýtt skilti sett í fyrra að ég held. Það er stærra og meira myndrænt en skiltið sem var þarna fyrir. Þú getur hins vegar ekki staðið og passað hvern einasta mann sem kemur til landsins þannig að þetta er mjög erfitt,“ segir Bryndís.

Veltir fyrir sér hvort ekki þurfi frekar að gæta ferðamannanna heldur en mosans

Ferðamenn voru hætt komnir í Reynisfjöru liðna helgi og kallaði Sveinn Kristján Rúnarsson, yfirlögregluþjónn hjá lögreglunni á Suðurlandi, í kjölfarið eftir því, í viðtali við RÚV, að sérstakur starfsmaður sæi um gæslu í fjörunni.

Aðspurð segist Bryndís ekki átta sig á því hvort að slíkt myndi leysa vandann í Reynisfjöru og bendir á að leiðsögumenn sem þangað komi með ferðamenn mismeti oft aðstæður; það sem einum þyki hættulegar aðstæður þyki öðrum ekki.

Bryndís nefnir þó að á sumrin sé til að mynda mjög virk gæsla á hálendinu með með fjölda landvarða en Umhverfisstofnun sér um landvörsluna.

„Þangað koma ennþá færri ferðamenn en hingað og maður veltir því svona fyrir sér hvort við eigum ekki frekar að eyða kröftum okkar í að gæta ferðamannanna heldur en mosans. Þetta eru náttúrulega bara spurningar sem við þurfum að fara að spyrja okkur,“ segir Bryndís og bætir við:

„Sem dæmi þá fóru 1200 bílar hér yfir Reynisfjall í gær og maður getur reiknað með að að minnsta kosti helmingur bílanna hafi farið niður í fjöru.“

Sjaldan jafngott veður og lítið brim og í dag

Bryndís segir að í dag muni viðbragðsaðilar á svæðinu setjast niður og fara yfir hvað gerðist í fjörunni í dag og hvað sé meira hægt að gera til að koma í veg fyrir slys á svæðinu.

Orri Örvarsson, formaður björgunarsveitarinnar Víkverja, segir í samtali Vísi að veður á svæðinu sé gott í dag.

„Það er sjaldan sem er jafngott veður og lítið brim eins og í dag,“ segir Orri um aðstæður í morgun. Mun meiri sjógangur hafi verið í gær og ölduhæð miklu meiri. Því sé greinilega ekkert samasemmerki á milli þess hvort veður sé gott eða slæmt hvort fólk sé í hættu eða ekki.

„Það gæti orðið annað banaslys hér á morgun.“