Myndband sýnir þegar kveikt er í bastkörfu skömmu áður en hótelið stóð í ljósum logum

Eigandi Hótels Ljósalands er sá sem situr í gæsluvarðhaldi vegna gruns um íkveikju sem varð til þess að mikið tjón varð í hluta hótelsins. Um er að ræða gamlar verbúðir sem fluttar voru á svæðið og innréttaðar sem hótelherbergi. Um þriðjungur þess húsnæðis mun vera ónýtur.

Fólk á næstu bæjum varð vart við eldinn sem sást greinilega úr nokkurra kílómetra fjarlægð. Þrír slökkviliðsmenn voru enn að slökkva í glóðum í morgun sem komu upp vegna mikils hita.

Lögregla mun rannsaka vettvanginn í dag og leitast við að fá grun sinn staðfestan hvernig kviknaði í. Nýtur lögreglan aðstoðar slökkviliðs á vettvangi.

Höfðu verið á Þorrablóti

Lögreglunni á Vesturlandi og Vestfjörðum barst tilkynning um fimmleytið aðfaranótt sunnudags vegna ölvaðs manns sem gekk berserksgang við hótelið. Hálftíma síðar var tilkynnt til lögreglu að kviknað væri í hótelinu. Mættu slökkviliðsmenn á vettvang en þá voru lögreglumenn af Hólmavík nýmættir á vettvang.

Voru nágrannar þá þegar komnir á svæðið. Mildi var að vind hreyfði vart um nóttina sem kom í veg fyrir að eldurinn bærist úr byggingunni í þá næstu.

Hinn grunaði, eigandi hótelsins, situr í gæsluvarðhaldi og verður þar að óbreyttu næstu fjóra dagana. Hafði hann verið á árlegu þorrablóti Ungmennafélagsins Stjörnunnar um kvöldið í félagsheimilinu Tjarnarlundi á Saurbæ. Var hann vel við skál eins og fleiri gestir.

Kveikt í bastkörfu

Einhverjir héldu svo gleðskapnum áfram á Hótel Ljósalandi en myndband, sem Vísir hefur undir höndum og lögregla sömuleiðis, sýnir hvar fólk situr við arineld á hótelinu og bastkarfa stendur í ljósum logum. Er myndbandið tekið skömmu áður en fyrst tilkynning berst lögreglu. Í myndbandinu er eigandinn spurður að því hvort honum sé virkilega svo kalt að kveikja þurfi í körfunni. 

Rannsókn málsins miðar vel að sögn lögregluyfirvalda á Vesturlandi en rannsóknardeild embættisins fer með rannsókn málsins. Eigandinn verður fluttur á Litla-Hraun í dag en hann mun að óbreyttu sæta gæsluvarðhaldi til fimmtudags.

Hinn grunaði keypti eignina haustið 2013 og hefur verið rekstur þar síðan sumarið 2014. Áður var þar veitingaskáli sem fór í þrot árið 2012.

Engin lögregla í Búðardal

Athygli vekur að lögreglu barst fyrst tilkynning um mann að ganga berserksgang og um hálftíma síðar barst önnur tilkynning um að kviknað væri í hótelinu. Ástæða þess að lögregla var ekki mætt fyrr á vettvang er sú að enginn lögreglumaður var á vakt í Búðardal þá nóttina.

Lögreglumenn af Hólmavík og Borgarnesi svöruðu kallinu og voru þeir fyrrnefndu mætir á undan þeim síðarnefndu. Leiðin um Þröskulda er umtalsvert styttri en um Bröttubrekku. Búðardalur er hins vegar í um hálftíma akstursfjarlægð.

Enginn lögreglumaður var á vakt í Búðardal um nóttina en í frétt RÚV kemur fram að mönnun þar geti verið tilfallandi. Nýr lögreglumaður taki þó til starfa þar í dag.