Neyðarlögin ótímabundin

Manuel Valls, forsætisráðherra Frakklands, segir ómögulegt að fella neyðarlög úr gildi fyrr en fullnaðarsigur hefur unnist á vígamönnum Íslamska ríkisins, DAISH-samtökunum svonefndu.

„Við verðum að uppræta og útrýma DAISH í Afríku, Mið-Austurlöndum og Asíu,” sagði Valls í viðtali við BBC á alþjóðlegu efnahagsráðstefnunni í Davos í Sviss í gær.

Hann sagði alþjóðlegt stríð vera háð gegn hryðjuverkamönnum.

„Á meðan ógnin er til staðar, þá verðum við að grípa til allra ráða,” sagði Valls og hélt því fram að stríð gegn hryðjuverkamönnum væri alheimsstríð: „Stríðið, sem við heyjum, þarf líka að vera altækt, hnattrænt og miskunnarlaust.”

Neyðarlögin voru sett í kjölfar hryðjuverkanna í París í nóvember. Þau eiga að renna úr gildi 26. febrúar.

Valls segir, í sama viðtali, nauðsynlegt að finna pólitíska lausn á ástandinu í Sýrlandi og Írak. En um leið þurfi Evrópusambandið að grípa strax til aðgerða til að verja ytri landamæri sín gegn þeim straumi flóttamanna, sem er að flýja styrjaldarástandið þar.

„Ef Evrópa er ófær um að gæta landamæra sinna, þá er hugmyndin sjálf um Evrópu í húfi,” sagði Valls, og á strangt til tekið við Evrópusambandið þegar hann talar um Evrópu.

Hann sagði auk þess vonlaust að Evrópuríki geti tekið við öllum sem flýja frá Sýrlandi og Írak. Það myndi grafa undan öllum stöðugleika í Evrópulöndum.

Á síðasta ári komu meira en milljón flóttamenn til Evrópu, flestir frá Sýrlandi og flestir sjóleiðina yfir Miðjarðarhafið. Þúsundir drukknuðu í hafinu. Valls sagði, aðspurður, að hann teldi Angelu Merkel Þýskalandskanslara ekki hafa gert mistök þegar hún sagði flóttafólk velkomið til Þýskalands. Hins vegar hafi þessar yfirlýsingar hennar haft mikil áhrif.

Flóttamannamálin voru helsta umræðuefnið í gær á fundi Merkel með Ahmed Davutoglu, forsætisráðherra Tyrklands, sem kom í heimsókn til Þýskalands.

Davutoglu leggur áherslu á að Evrópusambandið útvegi Tyrkjum meira fé til þess að sinna flóttafólki í Tyrklandi. Meira en 2,5 milljónir flóttamanna frá Sýrlandi eru í Tyrklandi.