Flytja hefur þurft tugi sjúklinga á milli spítala

Bilun í tölvusneiðmyndatæki á Landspítalanum í Fossvogi ógnar öryggi sjúklinga á bráðamóttökunni. Flytja hefur þurft tugi sjúklinga, sem margir hverjir eru mjög veikir, í sneiðmyndatöku á Landspítalanum við Hringbraut en slíkt reynist sjúklingunum erfitt.

Aðfaranótt föstudagsins varð bilun í tölvusneiðmyndatæki á Landspítalanum í Fossvogi þar sem bráðamóttaka spítalans er. Þetta er eina slíka tækið í húsinu. Það er mikið notað en að meðaltali eru teknar sneiðmyndir af fimmtíu sjúklingum á dag með tækinu. Viðgerð lýkur í fyrsta lagi á mánudaginn þar sem panta þurfti varahlut til landsins.

„Í nútíma læknisfræði þá er þetta tæki í raun og veru lykilgreiningartæki fyrir bráða og alvarlega sjúkdóma og þess vegna hefur þetta svo mikil áhrif á störf okkar,“ segir Hilmar Kjartansson yfirlæknir bráðamóttökunnar.

Annað tölvusneiðmyndatæki er á Landspítalanum við Hringbraut. Tugir sjúklinga sem komið hafa á bráðamóttökuna í dag og í gær og nauðsynlega þarf að taka sneiðmynd af, hafa því verið sendir þangað með sjúkrabíl. Myndatakan og ferðin fram og aftur til baka getur tekið allt að fjörutíu mínútur. Ferðin reynist því mörgum erfið. „Þetta geta verið veikustu sjúklingarnir okkar sem að þurfa þennan flutning,“ segir Hilmar. 

Hilmar segir ástandið geta skapað hættu fyrir sjúklingana og ógna öryggi þeirra. Þá segir hann tækið úrsérgengið. Nauðsynlegt sé að fá annað slíkt tæki á spítalann svo tækin séu að minnsta kosti tvö. „Ég hef heyrt að þetta tæki sé með eina af hæstu notkunartölum fyrir öll sambærileg tæki í Evrópu þannig það er augljóslega kominn tími á að endurnýja þennan kost,“ segir Hilmar.