Skipulagsmál og Sigmundur: „Í hvaða veruleika ertu?“

Heiða Kristín Helgadóttir, Sigríður Á. Andersen og Svanborg Sigmarsdóttir ræddu um skipulagsmál í miðbænum og afskipti forsætisráðherra af þeim hjá Sigurjóni M. Egilssyni í þættinum Sprengisandi á Bylgjunni í morgun. Þær tókust á um hvort Sigmundur Davíð Gunnlaugsson forsætisráðherra væri að beita valdi sínu í umræðunni um Hafnartorgsreitinn.

Sama útlitið aftur og aftur

„Ég er nokkuð sátt við það að forsætisráðherra skuli vekja máls á þessum málaflokki sem er skipulagsmál,“ sagði Sigríður, þingmaður Sjálfstæðisflokksins, um forsætisráðherrann. „Hann er að vekja máls á þessu skipulagi og ég tek undir með honum að mér finnst bæði vinnubrögðin í kringum þessi skipulagsmál, í miðborginni sérstaklega, og hvernig menn geta komist trekk í trekk í trekk að sömu niðurstöðu um útlit bygginga, alveg sama hvar í miðborginni nýjar byggingar eiga að rísa,“ sagði hún.

Svanborg sagði að það væri einfaldlega ekki hlutverk forsætisráðherra að hlutast til um útlit miðbæjarins. „Það að hann ætli einhvern veginn að stýra útlitinu á miðbænum [...], það er bara ekki hlutverk forsætisráðherra. Hann getur vissulega sem borgari haft skoðun á þessu,“ sagði hún. „En hann á ekki að beita valdi sínu umfram það sem aðrir geta gert.“

Nýjasta útspilið er samstarf

Sigríður greip þar inn í og sagðist efast um að hann væri að beita einhverju valdi í nýjasta útspili sínu og benti á að hann væri nú í samráði við lóðareigendur. „Þau spurningarmerki sem ég set við þetta er að í fyrsta lagi vissi ég nú ekki einu sinni að stjórnarráðið þyrfti húsnæði, en það kann auðvitað að vera, það hlýtur að vera fyrst að hann segir það. Ég hef sjálf efasemdir um það að þetta sé besti staðurinn fyrir stjórnarráðið á þessum stað,“ sagði hún og vísaði í umræðuna.

Svanborg sagði þá að hún væri ekki að tala um að Sigmundur væri að beita valdi sínu með lagasetningu. „En vissulega er hann að beita þarna ákveðnu valdi sem hann hefur sem forsætisráðherra sem aðrir hafa ekki. Með því að fara út í þessa umræðu hefur hann ákveðið vægi og eftir umræðuna um til dæmis hafnarbakkann er maður ekkert hissa á því að verktakar sem ætla að fara að byggja í miðbænum horfi til þess hvað ætlar forsætisráðherra að segja við þessu,“ sagði hún.

Tók sjálfur þátt í skipulaginu

Heiða Kristín, sem er fyrrverandi aðstoðarmaður borgarstjóra, sagði að Sigmundur hefði sjálfur átt þátt í því skipulagi sem gildir um marga reiti í miðborginni og það byggingarmagn sem þar er heimilað. 

„Sigmundur Davíð tók nú þátt í því sjálfur sem fulltrúi í umhverfis- og skipulagsráði Reykjavíkur að leyfa mikið af þessu byggingarmagni –ekki endilega kannski á þessum reit, ég kann ekki alveg þá sögu – en á mörgum reitum í miðbænum þar sem var gríðarlegt byggingarmagn heimilað á mörgum reitum,“ sagði hún.

Hún sagði að það hefði farið stór hluti af síðasta kjörtímabili í borgarstjórn að vinda ofan af mjög erfiðum deilum í skipulagsmálum sem höfðu staðið kannski í tíu ár án þess að neitt hafi gerst. 

„Og núna eru hlutirnir að fara af stað og mikið af þessu er kannski meira byggingarmagn en við myndum vilja í einhverjum fyrirmyndarheimi en skipulagsmál eru þannig að þú getur aldrei náð algjörum „konsensus“ um eitthvað og þess vegna finnst mér svo skrýtið svona yfirlýsingar eins og frá forsætisráðherra þar sem hann kemur í sjónvarpsfréttir RÚV og lýsir því einhvern veginn yfir að nú verði allir glaðir. Þetta er bara eitthvað svona í hvaða veruleika ertu?“

Klumpur með ráðuneytisbyggingum

Heiða Kristín sagði að henni þætti ekki heillandi að fá gríðarstóra stjórnarráðsbyggingu á reitinn sem deilt sé um. „Það sem þarf er starfsemi þar sem fólk flæðir inn og út, það gerir hvaða miðbæ sem er, sama hvaða veðurskilyrði eru, það gerir hann mannvænan og spennandi stað til að vera á. Einhver klumpur með ráðuneytisbyggingum heillar mig ekki,“ sagði hún.

Sigríður sagði að byggingarmagnið væri ekki aðal málið heldur þyrfti útlitið að geta borið byggingarmagnið. „Og það er það sem ég held, og ég upplifi að minnsta kosti, að til dæmis forsætisráðherra er að hnýta í að útlitið á þessum húsum ber ekki þetta byggingarmagn. Ég held að menn geti fallist á mikið byggingarmagn á mörgum af þessum reitum ef útlitið væri boðlegra.“