Bréfberi sem brást skyldu sinni kærður til lögreglu

Bréfbera Póstsins, sem brást skyldu sinni, hefur verið sagt upp störfum og málið kært til lögreglu. Þetta kemur fram í tilkynningu frá fyrirtækinu en þar segir að umræddur bréfberi bar ekki út póstinn og geymdi hann. Málið komst upp í gær og skilaði þá bréfberinn póstinum en um var að ræða töluvert magn bréfa.

Stærstur hluti póstsins var dagsettur á tímabilinu 4. nóvember til 26. nóvember en einnig var póstur dagsettur í desember meðal þess sem fannst. Póstinum verður dreift á næstu dögum. Ekki er um allan póst sem átti að berast á umrætt svæði að ræða. Málið komst upp í kjölfar ábendingar frá viðskiptavini.

Vekur Pósturinn athygli á því að allar ábendingar sem berast fyrirtækinu eru skoðaðar og vill Pósturinn þakka árvekni viðskiptavina sem auðveldar Póstinum að halda uppi gæðaþjónustu.

Pósturinn harmar þetta atvik og mun leggja allt kapp á að koma í veg fyrir að þetta geti endurtekið sig.

Göturnar sem um ræðir eru eftirfarandi:

Breiðahvarf

Brekkuhvarf

Dimmuhvarf

Ennishvarf

Fannahvarf

Faxahvarf

Fákahvarf

Fellahvarf

Fornahvarf

Fossahvarf

Funahvarf

Grundarhvarf

Melahvarf

Urðarhvarf

Vatnsendabletturinn

Víkurhvarf

Ögurhvarf