Formleg rannsókn hafin á lögreglufulltrúanum sem samstarfsmenn efast um

Kolbeinn Tumi Daðason skrifar 12. janúar 2016 13:40

Ólafur Þór Hauksson, nýskipaður héraðssaksóknari. Embættið tók við af embætti sérstaks saksóknara um áramótin.

Héraðssaksóknari hefur tekið til formlegrar rannsóknar mál lögreglufulltrúa sem í áraraðir hefur legið undir grun hjá samstarfsmönnum um óeðlileg samskipti við aðila sem hafa verið til rannsóknar hjá fíkniefnadeild.

Ólafur Þór Hauksson héraðssaksóknari staðfesti í samtali við fréttastofu í morgun að málið hefði borist embættinu frá ríkissaksóknara. Það gerðist í gær. Það verður því Ólafs Þórs og hans samstarfsmanna að rannsaka málið og meta hvort tilefni sé til þess að gefa út ákæru á hendur fulltrúanum. Hann er rúmlega fertugur og hefur verið við störf hjá fíkniefnadeild í um áratug.

Fulltrúinn stýrði meðal annars tálbeituaðgerð lögreglu í umfangsmiklu fíkniefnamáli sem lauk með handtöku sendisveins við Hótel Frón á Laugavegi í apríl í fyrra. Þó er þess hvergi getið í gögnum málsins að hann hafi komið að aðgerðum. Hann var heldur ekki látinn bera vitni fyrir héraðsdómi heldur undirmaður hans sem einnig kom að stjórnun aðgerða.

Um annað af tveimur málum er að ræða þar sem starfsmenn hjá fíkniefnadeild lögreglu eru sakaðir um óeðlileg samskipti við meinta brotamenn. Í hinu málinu hafa bæði lögreglumaður og karlmaður með brotasögu setið í gæsluvarðhaldi.

Friðrik Smári bar ábyrgð á tálbeituaðgerð við Hótel Frón í apríl en umræddur lögreglufulltrúi stýrði aðgerðinni í hans umboði.Vísir/Anton Brink

Færður endurtekið til í starfi

Lögreglufulltrúinn var færður þrisvar til í embætti á liðnu ári eftir að meirihluti samstarfsmanna hans, alls níu lögreglumenn, kvörtuðu í sameiningu og töldu sig ekki geta unnið án þess að áralangar ásakanir yrðu teknar til skoðunar.

Þegar engin viðbrögð fengust frá yfirmanni þeirra, Friðriki Smára Björgvinssyni, leituðu þeir til lögreglustjórans Sigríðar Bjarkar Guðjónsdóttur. Allajafna er fyrirkomulagið þannig að aðeins er leitað til næstu yfirmanna með umkvörtunarefni. Í framhaldinu var lögreglufulltrúinn færður úr stöðu sinni sem yfirmaður innan bæði fíkniefnadeildar og upplýsingadeildar og tók til starfa hjá kynferðisbrotadeild.

Áður en árið var úti var hann svo færður tvívegis til í starfi til viðbótar en var síðast þegar vitað var að störfum hjá tæknideild lögreglu.

Sú staðreynd að fulltrúinn gegndi yfirmannsstöðu í bæði fíkniefna- og upplýsingadeild á sama tíma er gagnrýnisverð að mati Kim Kliver, yfirmanns í dönsku lögreglunni. Sami aðili eigi ekki að taka ákvarðanir í báðum deildum og fyrirkomulagið þekkist ekki í nágrannalöndum okkar.

Karl Steinar og lögreglufulltrúinn störfuðu afar náið saman í fíkniefnadeildarinnar á árum Karls Steinars sem yfirmanns deildarinnar.Vísir/Ernir

Fullyrti að rannsókn hefði farið fram

Samstarfsmenn lögreglufulltrúans hafa um árabil gert athugaemdir við störf hans og aðgerðir sem hann hefur komið að. Þá hafa einnig borist ábendingar frá aðilum utan úr bæ um að fulltrúinn væri með óhreint mjöl í pokanum.

Þegar ásakanir voru háværar árið 2011 hélt Karl Steinar Valsson, þáverandi yfirmaður fíkniefnadeildar, fund með starfsmönnum sínum. Fullyrti hann að rannsókn á ásökununum hefði farið fram og þær ekki reynst á rökum reistar. Menn ættu að hætta að ræða ásakanirnar og einbeita sér að vinnunni.

Karl Steinar, sem nú er fulltrúi Íslands hjá Europol, sagði í Fréttablaðinu um helgina að hann myndi vel eftir fundinum en þó ekki alveg því orðalagi sem hann hefði notað. Hann hefði skilað greinargerð til yfirmanna sinna, Friðriks Smára Björgvinssonar og Jóns H.B. Snorrasonar. Hann væri ekki meðvitaður um hvaða meðferð málið hefði hlotið í kjölfar.

Þá sagðist hann ekki vera í stöðu til að tjá sig um hvort ásakanirnar hefðu verið það alvarlegar að taka ætti málið til rannsóknar hjá ríkissaksóknara.

Jón H.B. Snorrason aðstoðarlögreglustjóri neitar að tjá sig um málið.

Hvað varð um greinargerð Karls Steinars?

Friðrik Smári og Jón H.B. hafa ekki viljað staðfesta hvort greinargerðin hafi borist né vilja þeir tjá sig um málið á nokkurn hátt.

Nú rúmum fjórum árum eftir að fullyrt var við starfsmenn fíkniefnadeildar að áralangar ásakanir hefðu verið rannsakaðar er loks hafin formleg rannsókn á ásökununum, hjá embætti héraðssaksóknara sem tók við málaflokknum af ríkissaksóknara um áramótin.

Leki og spilling í lögreglu

Tengdar fréttir

Mest lesið

Fleiri fréttir