Efast um að þingmenn Sjálfstæðisflokksins styðji frumvörpin

Áslaug Arna Sigurbjörnsdóttir, ritari Sjálfstæðisflokksins, er ósátt við húsnæðisfrumvörp velferðarráðherra. Hún segir þau ekki til þess fallin að bæta húsnæðismarkaðinn.

„Skyndilausn sem á að afla Framsóknarflokknum fylgis í næstu kosningum,“ segir Áslaug.

Velferðarnefnd fundaði um frumvörpin í gær. Stefnt er að því að tvö frumvörp ráðherra verði að lögum fyrir mánaðamót.

Silja Dögg Gunnarsdóttir, þingkona Framsóknarflokksins, er ánægð með útkomuna.

„Við vonumst eftir breiðri samstöðu á þingi um málin. Mér finnst þessi frumvörp vera til bóta,“ segir hún. Með frumvörpunum sé verið að tryggja framboð á leiguíbúðum og að allir geti fengið íbúð á viðráðanlegu verði. „Með þessum frumvörpum nálgumst við marga hópa, svo sem námsmenn, ungt fólk, eldri borgara og alla þá sem vilja búa við þann sveigjanleika að vera á leigumarkaði.“

Áslaug segist hins vegar vera svekkt yfir frumvörpum félags- og húsnæðismálaráðherra. 

„Þessi frumvörp eru ekki varanleg lausn á húsnæðismarkaði. Við fyrstu sýn virðist þetta vera skammtímalausn. Þau gera ráð fyrir miklu inngripi ríkis varðandi stórhækkaðar bætur sem leiðir til hækkunar leiguverðs,“ segir Áslaug Arna og bendir á að ekki sé búið að skoða hagræn áhrif frumvarpa ráðherrans. „Því er maður svekktur yfir að þetta sé niðurstaða Eyglóar eftir allan þennan tíma.“ Hún segir stefnu Sjálfstæðisflokksins skýra og snúast um að minnka afskipti ríkisins til að auðvelda fólki að eignast húsnæði. 

„Ríkið skiptir sér of mikið af íslenskum húsnæðismarkaði nú þegar. Því á ég erfitt með að sjá að sjálfstæðismenn samþykki frumvörpin eins og þau líta út núna.“

Elsa Lára Arnardóttir segir frumvörpin um húsnæðisbætur tryggja jafnræði milli þeirra sem eru á leigumarkaði og þeirra sem búa í eigin húsnæði. 

„Með nýjum húsnæðisbótum stóraukum við stuðning við fólk á leigumarkaði. Um milljarði króna verður varið til þess á þessu ári. Allt er þetta gert samkvæmt yfirlýsingu ríkisstjórnar frá 28. maí í tengslum við nýja kjarasamninga. Því munum við reyna að klára tvö frumvörp af fjórum nú strax fyrir mánaðamót,“ segir hún.