Fundu fíkniefni í sölupakkningum við húsleit

Lögreglan á Suðurnesjum stöðvaði ökumann á þrítugsaldri í vikunni sem reyndist vera undir áhrifum amfetamíns, metamfetamíns og kannabisefna við aksturinn, auk þess sem hann hafði aldrei öðlast ökuréttindi. Þá var bifreiðin sem hann ók ótryggð og óskoðuð.  Samkvæmt tilkynningu frá lögreglunni framvísaði maðurinn amfetamíni sem var í bifreiðinni, auk þess sem lögreglumenn fundu útdraganlega kylfu í hólfi í henni. Skráningarnúmerin höfðu verið fjarlægð af bifreiðinni.

Tveir ökumenn til viðbótar, sem lögreglan hafði afskipti af reyndust einnig vera undir áhrifum fíkniefna. Í húsleit á dvalarstað annars þeirra fundust meint fíkniefni í sölupakkningum, að hluta til meint MDMA. Einnig munir sem bentu til dreifingar og sölu fíkniefna og fjármunir sem voru haldlagðir.

Þjófnaður á dekkjum úr gámi var tilkynntur til lögreglunnar á Suðurnesjum í vikunni. Um var að ræða átta nýleg, negld vetrardekk og var annar gangurinn á álfelgum. Gámnum hafði verið lokað með borða og strekkjara sem læstur var með lás. Það dugði ekki til því sá eða þeir sem þarna voru að verki skáru á borðann og komust þannig inn.  Málið er í rannsókn.

Þá var kærður stuldur á greiðslukorti. Slóð þess var rakin þar sem það hafði verið notað í verslunum og hafði verið verslað fyrir tæplega 30 þúsund krónur. Vitað er hver þarna var að verki.

Loks hafði einhver fingralangur tekið gaskút sem var fyrir utan íbúðarhúsnæði í umdæminu.