Farþegar yfirbuguðu dólginn eftir að hann greip í stýrið

Snörum handtökum bílstjóra og farþega flugrútunnar má þakka að ekki fór illa þegar ölvaður farþegi greip í stýrið á fullri ferð. Bílstjórinn snarhemlaði og nokkrir farþegar yfirbuguðu manninn. Lögregla var kölluð til og var hún mætt innan skamms tíma og handtók manninn.

Kristján Daníelsson, framkvæmdastjóri Kynnisferða, segir mikla mildi að ekki hafi farið verr. Þannig hafi umræddur farþegi verið með eitthvað lítilsháttar vesen eftir að hann kom um borð í rútuna við flugstöðina. Annar farþegi hafi náð að halda honum rólegum en þegar sá yfirgaf flugrútuna í Hafnarfirði var friðurinn úti.

Gerði atlögu að bílstjóranum

„Þá æsist hann upp og gerir atlögu að bílstjóranum á ferð,“ segir Kristján. Eðli málsins samkvæmt hafi skapast hætta en bílstjórinn hafði brugðist hratt við og stöðvað bílinn. Tveir til þrír farþegar hafi hjálpast að við að yfirbuga manninn sem lögregla handtók.

Nokkru áður hafði maðurinn hringt í lögreglu og tilkynnt að bílstjórinn væri undir áhrifum. Mæling á vettvangi leiddi í ljós að ekkert áfengi var að finna í blóði bílstjórans. Allt annað gilti um þann sem handtekinn var.

Kristján segir að því miður lendi flugrútan í því annað slagið að ölvaðir einstaklingar láti illa um borð í rútunni en sem betur fer sé það ekki reglulega.

„Venjulega næst að róa menn eða mönnum er ekki hleypt um borð,“ segir Kristján. Það sé þó alltaf spurning hversu ölvaður maður megi vera til að fá að fara með rútunni.

„Gríðarlega sjokkerandi“

Starfsfólk og bílstjórar Kynnisferða eru upp til hópa vel þjálfaðir og vanir. Þetta atvik verði þó tekið til sérstakrar skoðunar og yfirfarið. Bílstjóranum hafi verið boðin áfallahjálp og aðstoð. Hann ráði því sjálfur hvort hann þiggi hann en misjafnt sé hve mikil áhrif atvik sem þessi hafi á einstaklinga.

„Þetta er auðvitað ekki þægilegt að vera á ferð og einhver kemur og grípur í stýrið. Þetta er gríðarlega sjokkerandi.“

Ekki hafa fengist upplýsingar frá lögreglu hvort um Íslending eða ferðamann var að ræða en líklegt má telja að upp ofurölvi heimamann hafi verið að ræða fyrst hann hringdi að eigin frumkvæði í neyðarlínuna og tilkynnti um ölvaðan bílstjóra, sem reyndist enginn fótur fyrir.