Making a Murderer dugar ekki til að frelsa Steven Avery

Þrátt fyrir að framleiðendum Netflixseríunnar Making a Murderer hafi tekist að sannfæra áhorfendur um að Steven Avery sé saklaus, er það ekki nóg til að ná honum úr fangelsi. Til þess þarf ný sönnunargögn, samkvæmt lögmanni hans, en vonir voru bundnar við að fólk sem byggi yfir frekari upplýsingum myndi stíga fram vegna þáttanna.

Avery var dæmdur í 53 ára fangelsi fyrir að hafa myrt hina 25 ára gömlu Teresa Halbach og varpa þættirnir ljósi á málið. Þeir hafa notið gífurlega vinsælda og hafa sannfært marga um að ekki hafi verið rétt haldið á málum þegar Avery var dæmdur.

Lögmaður Avery, Dean Strang hefur fengið tölvupósta víðsvegar að úr heiminum frá því þættirnir voru fyrst sýndir og þar á meðal frá Íslandi, samkvæmt New York Daily News, sem ræddi við Strang.