Ögmundur varar við leynimakki með fullveldi Íslands

Ögmundur Jónasson varar við þátttöku Íslendinga í TÍSA viðræðunum svokölluðu þar sem verið sé að semja um breytingar á samfélagsgerðinni sem ekki verði dregnar til baka. Utanríkisráðherra segir samningana hins vegar nauðsynlega smáríki eins og Íslandi.

TISA viðræðurnar snúast um að samræma lög þjóðríkja um allan heim í markaðsmálum en viðræðurnar hafa farið mjög leynt. Ögmundur Jónasson sagði í sérstökum umræðum á Alþingi í dag að almenningur gæti þakkað Wikileaks fyrir að hafa birt gögn sem upplýstu um hvað væri verið að semja.

Mikil andstaða hefur myndast við þessa samninga í Evrópu þar sem þeir muni hefja stórfyrirtæki upp fyrir lög og rétt og aðeins verði úrskurðað í deilumálum ríkja við fyrirtækin í lokuðum gerðardómum með aðild fyrirtækjanna.. Ögmundur sagði margt við þessa samninga 50 ríkustu þjóða heims að athuga.

„Í fyrsta lagi er verið að semja um skipulag samfélagsins. Að undirgangast að færa tiltekin þjónustusvið inn á markaðstorg þar sem jafnræði skuli ríkja. Bæði innan þjóðríkjanna og á milli þeirra,“ sagði Ögmundur

Þegar einu sinni hafi verið skrifað undir TISA samningana væru þeir óafturkræfir.

„Það sem einu sinni er samið um, það sem núverandi ríkisstjórn semur um, gerir hún fyrir hönd komandi ríkisstjórna og komandi kynslóða. Í þessu er fólgið fullveldisafsal,“ sagði Ögmundur.

Fleiri þingmenn stjórnarandstöðuflokkanna gagnrýndu þessa samninga og vöruðu við því að Íslendingar gerðust aðilar að þeim.Gunnar Bragi Sveinsson utanríkisráðherra segir viðræðurnar um TISA hefðbundnar viðræður um þjónustuviðskipti í anda fríverslunarsamninga. Hann reikni með að viðræðunum ljúki á þessu ári en samningar taki ekki gildi fyrr en Alþingi hafi staðfest þá. Fylgjast megi með störfum íslensku samninganefndarinnar á vef utanríkisráðuneytisins. „Ég held að að séu fá ríki sem eigi jafn mikið undir slíkum samningum sem hér er verið að tala eins og smáríki eins og ísland. Þar sem við getum komið okkar stefnu á framfæri og unnið að því að efla okkar viðskipti út á við,“ sagði Gunnar Bragi Sveinsson.