Handtekinn vegna gruns um að halda úti vefsíðu sem sýndi börn í kynferðislegum tilgangi

Karlmaður á fimmtugsaldri var handtekinn nú síðdegis grunaður um að halda úti vefsíðu sem sýndi börn í kynferðislegum tilgangi. Hann er grunaður um kynferðislega áreitni gegn börnum, vörslu á barnaklámi og fyrir blygðunarsemisbrot.

Það var lögreglan á Suðurnesjum sem handtók manninn klukkan fimm í dag á heimili hans í Keflavík. Hann er á fimmtugsaldri og er ekki íslenskur ríkisborgari. Þetta staðfestir lögreglan á Suðurnesjum.

Nokkrar kærur liggja á borði lögreglunnar á Suðurnesjum vegna mannsins fyrir kynferðislega áreitni og fyrir blygðunarsemisbrot. Maðurinn er grunaður um að hafa haldið úti vefsíðu en á henni voru tugir mynda af stúlkum undir lögaldri en hann sagðist gera umræddar stúlkur út í fylgdarþjónustu. Ef ýtt var á mynd af stúlku opnaðist nýr gluggi sem innihélt gróft klám. Síðunni hefur nú verið lokað.

Þá er maðurinn einnig grunaður um vörslu á barnaklámi.

Samkvæmt upplýsingum frá lögreglunni verður farið fram á gæsluvarðhald yfir manninum. Málið sé í algjörum forgangi hjá lögreglunni og allt kapp lagt á að það upplýsist sem fyrst.

Ekki var hægt að veita frekari upplýsingar um málið að svo stöddu.