Forsætisráðherra talaði um misskiptingu í hátíðarræðunni

Samfélag Afgirt svæði á Austurvelli vegna hátíðardagskrár þjóðhátíðardagsins í gær var töluvert stærra en verið hefur síðustu ár.

Breytingin er sögð hafa verið gerð í samstarfi við forsætisráðuneytið og Alþingi vegna mótmælanna sem voru við Austurvöll á þjóðhátíðardeginum í fyrra. Þá hópuðust þar saman allt að þrjú þúsund manns til að mótmæla þáverandi ríkisstjórn Sjálfstæðisflokksins og Framsóknarflokksins, sem leidd var af Sigmundi Davíð Gunnlaugssyni, þáverandi forsætisráðherra.

Í viðtali við Vísi sagði Ágúst Svansson, aðalvarðstjóri hjá lögreglunni á höfuðborgarsvæðinu, sem yfirumsjón hafði með öryggisgæslu á Austurvelli, að hátíðardagkráin hafi farið friðsamlega fram.

Hátíðarhöld 17. júní voru annars með hefðbundnu sniði um land allt. 

Tugir þúsunda Íslendinga lögðu leið sína í miðbæ Reykjavíkur til þess að fagna deginum. Meðal dagskrárliða í borginni var fornbílasýning, mót í siglingum og þétt tónlistardagskrá í Hörpu. Veður var milt þótt sólin hefði ekki látið sjá sig. 

Sigurður Ingi Jóhannsson, núverandi forsætisráðherra, hélt ræðu á Austurvelli líkt og venjan er. Í ræðu sinni ræddi forsætisráðherrann misskiptingu í samfélaginu.

„Ísland er auðugt land, land sem býr við gnægð auðlinda og mannauð mikinn. Þann auð eigum við að nýta til að tryggja sem best að á Íslandi þurfi enginn að líða skort,“ sagði hann í ræðunni. „Það er stórt verkefni sem ekki verður leyst í einu vetfangi, og það verður aðeins leyst þannig að við leggjumst öll á árar – saman.“

Sigurður Ingi sagði fólk ekki gera kröfu um að allir séu jafnsettir en fólk hafi hins vegar ekki þol fyrir óréttlátri skiptingu þar sem sumir fái að njóta á meðan aðrir gera það ekki. „Sérstaklega á þetta við þegar tilfinning fólks er sú að sumir fái fleiri og betri tækifæri en aðrir. En gleymum því ekki heldur að hver er sinnar gæfu smiður.“

Það var ekki eingöngu í Reykjavík sem menn fögnuðu deginum, heldur var það gert í flestum stærri byggðarlögum. 

Á Akureyri var hátíðardagskrá í Lystigarðinum og skátakvöldvaka, í Reykjanesbæ var metnaðarfull skemmtidagskrá, á Ísafirði var gengin skrúðganga með skátum og lögreglu í broddi fylkingar og á Egilsstöðum var glænýtt leikrit um Lagarfljótsorminn frumsýnt við mikinn fögnuð, svo eitthvað sé nefnt.

Fréttin birtist fyrst í Fréttablaðinu 18. júní.