Hvassviðri suðvestanlands í kvöld

Veðurstofa Íslands varar við hvassri suðaustanátt síðdegis og í kvöld. Búast má við rigningu og tíu til átján metrum á sekúndu í vindhraða suðvestanlands upp úr klukkan þrjú í dag.

Hvassast verður undir á Suðurnesjum og undir Eyjafjöllum, en þar má reikna með vindhraða upp á þrjátíu til 35 metra á sekúndu í hviðum og segir Veðurstofan að varasamt verði að vera þar á ferð á húsbílum og með aftanívagna.

Mun hægari vindur verður fyrir norðan og austan í dag, þar verður þurrt og gæti hiti náð yfir tuttugu stig þar sem best lætur.

Upp úr miðnætti verður hægari vindur sunnanlands. Í fyrramálið verður suðaustan- og austanátt fimm til þrettán metrar á sekúndu og rigning með köflum um vestanvert landið. Áfram verður hlýjast og úrkomulítið norðaustanlands.