Ný salerni í borginni fyrir hálfan milljarð

Starfshópur leggur til að 535 milljónum króna verði varið í uppbyggingu almenningssalerna í borginni. Þetta kemur fram í drögum að nýrri skýrslu, Almenningssalerni í Reykjavík – stefna og staða 2016, sem kynnt var fyrir umhverfis- og skipulagsráði nýlega.

Í drögunum kemur fram að á síðastliðnum áratug hafi fjölda almenningssalerna verið lokað og veruleg þörf sé á fleiri almenningssalernum í ljósi aukins fjölda ferðamanna í Reykjavík. Rekstraraðilar veitingahúsa í miðbænum kvarti mjög undan ágangi ferðamanna sem þurfi að komast á salerni. Auk þess sé þörf á að bæta aðstöðu fatlaðra og barnafólks á þeim almenningssalernum sem fyrir eru.

Lagt er til að endurnýja þau sjö sjálfvirku salerni sem eru í miðbænum og byggja ný almenningssalerni með aðgengi fyrir alla á tólf stöðum, meðal annars við Ægisíðu, Nauthólsvík og Esjuna. Einnig að varið verði um sjö milljónum til að bæta merkingar, aðgengi og upplýsingagjöf.

Í skýrslunni kemur ekki fram hvort einkafyrirtæki eða Reykjavíkurborg myndu reka salernin eða hvort gjald yrði tekið fyrir notkun, en að meðaltali kostar rekstur hvers salernis um tvær milljónir króna á ári.

Hildur Sverrisdóttir, aðalmaður fyrir hönd Sjálfstæðisflokksins í umhverfis- og skipulagsráði, telur að verið sé að leggja í of miklar framkvæmdir. Hún sýni því skilning að bregðast þurfi við fjölgun ferðamanna en hún óttist að þetta sé skammtímalausn. „Þegar við erum að tala um svona miklar framkvæmdir og svona mikla peninga, af hverju skoðum við þá ekki varanlegri, og almennilegri, lausnir?“

Hildur segir að til dæmis væri hægt að byggja almenningssalerni neðanjarðar eða nota fjármunina til að endurbyggja Núllið svo það henti þörfum allra. Hún telur að minnsta kosti ekki nauðsynlegt að setja fjármuni í klósettmannvirki á öðru hverju horni. „Ef allar þessar tillögur ná fram að ganga þá verður almenningsklósett með nánast tíu metra millibili,“ segir hún.

Hildur tekur vel í þá hugmynd sem nefnd er í drögunum að borgin geri samkomulag í gegnum leigusamning við aðila sem reki salerni, til dæmis sundlaugar og menningarhús, um að þau þjóni almenningi og hægt sé að vísa á þau sem slík.

Ekki náðist í Hjálmar Sveinsson, formann umhverfis- og skipulagsráðs, við vinnslu þessarar fréttar.

Fréttin birtist fyrst í Fréttablaðinu