Óvæntur glaðningur frá forseta Íslands beið Lilju Katrínar

Lilju Katrínu Gunnarsdóttur, bökunarsnillingi með meiru, beið óvæntur glaðningur þegar hún kom heim úr vinnunni í dag. Glaðningurinn var frá Guðna Th. Jóhannessyni, forseta Íslands, sem mætti heim til Lilju á dögunum þegar hún stóð fyrir sólarhrings bökunarmaraþoni til styrktar Krafti.

„Er ég kom heim úr vinnunni beið mín forsetaritari með gjö frá forseta Íslands – árituð og innrömmuð blaðaúrklippa af okkur forsíðufyrirsætunum. Stundum taka dagarnir óvænta stefnu,“ skrifar Lilja Katrín á Facebook.

Myndin sem um ræðir hefur vakið mikla athygli en þar má sjá hvar Lilja brestur í grát er forsetinn birtist í eldhúsinu heima hjá henni. Lilja hafði þá staðið vaktina í eldhúsinu í tæpan sólarhring og báru tilfinningarnar hana, og Guðna sjálfan, ofurliði.

„Hann brosti og þakkaði mér fyrir og þá brutust allt í einu allar þessar uppsöfnuðu tilfinningar út. Ég fór bara að hágráta svo ég segi það hreint út. Ég gróf andlit mitt í höndum mínum og reyndi að hafa hemil á þessu tilfinningaflóði án árangurs. En er ég leit upp aftur á forseta vor sá ég að hann var líka farinn að gráta,“ sagði Lilja að maraþoninu loknu í síðustu viku.

Alls söfnuðust ríflega 500 þúsund krónur í maraþoninu og mun fjárhæðin renna óskert til Krafts – stuðningsfélags fyrir ungt fólk með krabbamein. Enn er hægt að styrkja málefnið í gegnum vefsíðu Lilju Katrínar, blaka.is.