Fernir tvíburar komu í heiminn á fimmtudag

„Þetta bjargaðist nú einhvern veginn eins og það gerir alltaf,“ segir Birna Gerður Jónsdóttir, yfirljósmóðir á Landspítala, en þann 14. júlí fæddust nítján börn og þar af fernir tvíburar á spítalanum.

„Við erum orðnar svo gamlar að við munum bara ekki alveg hvað metið var en þetta er allavega mjög nálægt því,“ segir Birna og hlær.

Á fimmtudaginn var sem sagt mikið annríki á fæðingardeildinni. Af tvíburapörunum fjórum fæddist þó einn tvíburi rétt eftir miðnætti á fimmtudeginum og er því fæddur þann 15. júlí.

„Það gerist ekki á hverjum degi að það fæðist fernir tvíburar,“ segir Birna Gerður og bætir við að meiri áhætta fylgi tvíburafæðingum. „Það auðveldaði okkur ekki fyrir að það var svona mikið af tvíburum enda koma fleiri fagaðilar að þannig fæðingum. Það er í raun meiri vinna að sinna svoleiðis fæðingum.“

Birna Gerður segir að allt hafi gengið vel en að það hafi þurft að kalla út mannskap.

„Þetta er kannski ekki beint besti tíminn til að ná í fólk en einn þriðji af starfsfólkinu okkar er í sumarfríi,“ segir hún og útskýrir að það sé auðveldara að fá fólk til vinnu á öðrum tímum en í miðjum júlí.

Meirihluti barnanna sem fæddust er stúlkur eða tólf talsins. Þá fæddust sjö drengir. „Það má segja að þetta hafi verið stelpudagur en stelpurnar voru í miklum meirihluta,“ segir hún.

Birna Gerður vill meina að ástæða þess að allt hafi gengið vel sé hversu gott starfsfólk deildarinnar er. „Það er svo frábært starfsfólk hérna og frábærar ljósmæður í þessu húsi. Það hjálpast allir að þegar það er mikið að gera og fólk er tilbúið að koma og hjálpa,“ segir Birna Gerður Jónsdóttir.