Þyrla Landhelgisgæslunnar kölluð út að rússneskum togara

Þyrla Landhelgisgæslunnar heldur nú að rússneskum togara vegna útkalls um að veikur skipverji þarfnist aðhlynningar. Togarinn er staðsettur í grænlenskri lögsögu. Þetta kemur fram í  tilkynningu frá Landhelgisgæslunni.

„Stjórnstöð Landhelgisgæslunnar barst nú í morgun beiðni frá rússneskum togara sem var á veiðum í grænlenskri lögsögu um aðstoð þyrlu vegna veiks skipverja. Metið var nauðsynlegt af lækni að sækja manninn og var því ákveðið að skipið sigldi nær landi og þyrla Landhelgisgæslunnar tæki svo á móti því um 150 sjómílur vestur af Reykjanesi,“ segir í tilkynningu.

„Áætlað er að TF-LIF, þyrla Landhelgisgæslunnar verði hjá skipinu um klukkan 15.00. Mun þyrlan flytja skipverjann á sjúkrahús í Reykjavík.“