Drekinn Haraldur hárfagri kominn á Selvogsbanka

Norska víkingaskipið Drekinn Haraldur hárfagri, sem siglir í kjölfar Leifs heppna til Ameríku, er væntanlegt til Reykjavíkur í nótt eða á morgun. Skipið var í morgun statt á Selvogsbanka vestan Vestmannaeyja og gæti náð inn á Faxaflóa og ytri höfnina í Reykjavík í kvöld eða nótt. Það siglir fyrir vindi og því eru tímasetningar óvissar því byr ræður en ákveðið er að móttökuathöfn verði í Reykjavíkurhöfn klukkan 14 á morgun, við Sjóminjasafnið.

Þetta er stærsta víkingaskip sem smíðað hefur verið í nútíma frá því víkingaöld lauk, 35 metra langskip, og krefst 30 manna áhafnar. Það lagði upp frá Ögvaldsnesi við Haugasund í Noregi þann 23. apríl. Til Íslands kemur skipið frá Þórshöfn í Færeyjum þar sem áhöfnin þurfti að bíða í viku eftir hagstæðum byr. Áður hafði skipið lent í óvæntu viðgerðarstoppi í Leirvík á Hjaltlandseyjum. 

Eftir mótttökuathöfnina verður skipið verður fært yfir á Austurbugt, sem er bryggjusvæðið við ráðstefnu- og tónlistarhúsið Hörpu.  Skipið mun hafa viðdvöl á Íslandi í 2-3 daga.  Á þessu tímabíli mun skipið vera opið almenningi milli 16:00-18:00. 

Leiðangurinn er til að minnast siglingaafreka Leifs Eiríkssonar og félaga fyrir þúsund árum. Frá Reykjavík liggur leiðin áleiðis til Eystribyggðar á Grænlandi, þar sem Eiríkur rauði nam land, en áfangastaðurinn þar er bærinn Qaqortoq við mynni Eiríksfjarðar hins forna.

Þaðan er áformað að sigla til Nýfundnalands, til L‘anse aux Meadows, en þar eru einu staðfestu rústir sem fundist hafa í Kanada eftir siglingar norrænna manna, eins og þeim er lýst í fornsögum. Drekinn Haraldur hárfagri siglir síðan inn Saint Lawrence-flóa til Quebec-borgar, þaðan áfram inn á Vötnin miklu og verður  meðal annars komið við í Toronto og Chicago. Áætlað er að siglingunni ljúki í Duluth í Minnesota í Bandaríkjunum þann 18. ágúst. 

Hér má sjá heimasíðu leiðangursins Expedition America 2016.