Dóttir Paul Walker fékk milljarð í bætur frá ökumanni bílsins

Dóttir bandaríska leikarans sáluga, Paul Walker, fékk 10 milljónir dollara í bætur, um 1,2 milljarða íslenskra króna, eftir að faðir hennar lést í bílslysi í desember árið 2013. Sátt náðist á milli hinnar sautján ára gömlu Meadow Walker og dánarbús Roger Rodas, vinar föður hennar en báðir fórust þeir í umræddu bílslysi þar sem Rodas var ökumaðurinn.

Lögmaður dóttur Walkers, Jeff Milam, segir Rodas hafa borið að hluta til ábyrgð á slysinu og þess vegna náðist samkomulag um að Meadow fengi þessar bætur. Samkomulagið náðist árið 2014 en var ekki gert opinbert fyrr en í gær þegar bandaríska fréttastofan TMZ birti upplýsingar um það á vef sínum.

Í yfirlýsingu sem sem Jeff Milam sendi á E! News kemur fram að þessar bætur sem dóttir Walkers fær séu ekki nema brot af því sem Walker hefði þénað til viðbótar á ferli sínum hefði hann lifað. Þegar Walker dó var hann við tökur á sjöundu myndinni í Fast and Furious-seríunni, Furious 7, sem er ein af tekjuhæstu myndum sögunnar.

Milam áréttaði einnig að Meadow myndi halda máli sínu gegn bílaframleiðandanum Porsche til streitu en Milam segir ætlunina að sanna að Porsche-bifreiðin sem Walker var í hafi verið gölluð og það hafi leitt til dauða hans.

Ekkja Rodas, Kristine Rodas, tapaði svipuðu máli fyrir dómi síðastliðinn mánudag en þar hélt hún því fram að maður hennar hefði látið lífið vegna nokkra öryggisþætti hefði vantað í Porsche Carrera GT-bifreiðina sem hann ók. Dómarinn í málinu taldi ekki nægar sannanir til að styðja þá ásökun.

Lögmaður dóttur Walkers bendir á að Rodas lést samstundis í slysinu en Walker hafi enn verið á lífi þegar eldur kom upp í bílnum.

Bílaframleiðandinn Porsche hefur neitað sök og segir bílnum hafa verið breytt af eigandanum og ekki haldið við.