Fullyrt að Pútín sé á leið til Íslands

Rússneskur milljarðamæringur, Iskander Makhmudov, er nú með Rangá Eystri á leigu. Hann er ekki mættur til landsins en hann er með ána í leigu í viku.

Eiríkur Jónsson fullyrðir á vefsíðu sinni að Pútín Rússlandsforseti sé væntanlegur til landsins, og þá til að fara að veiða í Rangá. Eiríkur segir mikinn viðbúnað vegna heimsóknarinnar og hefur öllu svæðinu við Rangá verið lokað. Þá segir Eiríkur að Pútín muni hafa leigt þrjá lögreglubíla og sex lögreglumenn af hinu opinbera til að tryggja öryggi enn frekar.

Iskander Makhmudov með Rangá á leigu

Vísir hefur ekki náð að fá þessar fregnir staðfestar. Sá sem varð fyrir svörum í sendiráði Rússlands kom reyndar alveg af fjöllum, taldi þetta afar ólíklegt svo ekki væri meira sagt; þeir myndu vita af komu Pútíns. Þessa frétt væri ekki hægt að staðfesta.

Eftirgrennslan Vísis hefur leitt það í ljós að Pútín er ekki að fara að veiða í Ytri-Rangá en Eystri-Rangá er ekki út úr myndinni hvað Pútín varðar. Reyndar er það svo að búið er að leigja hana út í vikutíma. Leigutakinn er einmitt vinur Pútíns, ólígarkinn Iskander Makhmudov, fæddur í Uzbekistan.

Makhmudov er eigandi mikilla koparnáma sem finna má í Úralfjöllum og stjórnar hann yfir 300 fyrirtækjum í níu fylkjum Rússlands.

Iskander enginn þurfalingur

Iskander Makmudov er sem sagt enginn þurfalingur, hann er í 380 sæti á lista Forbes yfir ríkustu einstaklinga heims. Metinn á 4,9 milljarða dollara sem eru tæpir 600 milljarðar króna.

Til samanburðar þá er Björgólfur Thor er metinn á 1,5 milljarð dollara eða 180 milljarða króna og er númer 1121 á lista.

Í Rangá eystri eru seldar 18 stangir. Makmudov er með ána í viku, frá og með í gær að telja. En, samkvæmt heimildum Vísis er hann ekki enn kominn. Hvort Pútín verði í för með vini sínum honum Iskander, það verður svo bara að koma í ljós.

Iskander Makmudov hefur áður veitt í Eystri-Rangá, þá leigt alla ána og er alveg undir hælinn lagt hvort hann fullnýtir tíma sinn. En, um tíu gædar eru í viðbragðsstöðu; til að leiða hina rússnesku veiðimenn um ána. Þar hefur verið frábær veiði í sumar og þá verulega hátt hlutfall stórlaxa.