Háskóladagur og kræsingar í Hörpu

Eftirlíking af Suðurlandsskjálftanum og kennsla í handþvotti var meðal þess sem boðið var upp á á árlegum háskóladegi í dag. Þá fengu mataráhugamenn- og konur eitthvað fyrir sinn snúð í Hörpu.

 

Allir háskólar landsins opnuðu dyrnar fyrir gestum og gangandi í dag til að kynna starfsemi sína, bæði fyrir verðandi nemendum og almenningi öllum. Háskólarnir á landsbyggðinni fengu athvarf í skólunum á höfuðborgarsvæðinu og boðið var upp á ókeypis strætóferðir á milli skólanna.

Í Öskju Háskóla Íslands fóru meðal annars fram áhugaverðar tilraunir á því að endurgera Suðurlandsskjálftann.

„Við erum hér að láta reyna á líkan sem við byggðum með því að láta það standa af sér Suðurlandsskjálftann árið 2008 eins og hann mældist í Foldaskóla í Reykjavík. Við notum reyndar ekki nema um 10% af þeirri orku til að byggingin tolli saman en hyggjumst gefa í undir lok dags og sjá hvað líkanið þolir,“ sagði Guðmundur Örn Sigurðsson, byggingaverkfræðingur. Hann sagði líkanið geta gefið góða mynd af því hvernig byggingar hreyfast í jarðskjálfta.

Þær Gunnhildur Einarsdóttir og Ingibjörg Loreley Zimsen Friðriksdóttir eru nýútkskrifaðir framhaldsskólanemar sem voru sammála um ágæti háskóladagsins. Þeim þótti gott að geta hitt nemendur og kennara og spurt þau út í það nám sem þær höfðu áhuga á.

Allar deildir háskóla landsins kynntu stafsemi sína og þar var hægt að læra margt fróðlegt, til dæmis allt um hinn fullkomna handþvott.

„Það vita kannski ekki allir hvað það er mikilvægt að sinna handþvotti vel,“ sagði Hulda Viktorsdóttir, hjúkrunarfræðinemi, en þær Henný Björk Birgisdóttir sýndu fréttamanni hvernig best er að bera sig að.

Og það var ekki bara í háskólum landsins sem dyrnar stóðu opnar. Í Hörpu kynntu hátt í fimmtíu matvælaframleiðendur vörur sínar fyrir áhugasömum.

Markaðurinn hefur verið haldinn reglulega síðastliðin fimm ár og hefur vaxið umtalsvert. Fyrst voru það um fimmtán framleiðendur sem stóðu vaktina en nú eru þeir um fimmtíu og óhætt að segja að framleiðslan sé fjölbreytt. Kjöt, fiskur, brauð, konfekt, brjóstsykur og krydd var á boðstólnum, og nýr íslenskur barnamatur.

„Við eigum að geta verið alveg sjálfbær hvað varðar matvælaframleiðslu. Það er í raun alveg ótrúlegt hvað við flytjum inn mikið af mat, því við vitum oft á tíðum ekkert hvaðan hann kemur né hvað er í honum,“ sagði Rakel Garðarsdóttir, sem á veg og vanda að hinum nýja barnamat ásamt Hrefnu Rósu Sætran.

Hér að neðan má sjá nokkrar myndir frá Háskóladeginum.