Kurr í Borgarholtsskóla

Dregist hefur að ráða í stöðu skólameistara Borgarholtsskóla, en fyrrverandi skólameistari lét af störfum fyrir rúmum mánuði. Einn kennara segir að kurr sé kominn í kennarahópinn, sem finnst þeir lítilsvirtir af stjórnvöldum.

„Umsóknarferlið er löngu búið og það er búið að liggja fyrir að fyrrverandi skólameistari yrði sjötug í mars. Þannig að það er ekkert þarna sem kemur fólki á óvart. Og við kennarar erum að upplifa svolítið virðingarleysi af hálfu stjórnvalda og svona ákveðna hunsun. Skiptir starf skólameistara þá ekki meira máli en það að það sé hægt að draga það mánuð eftir mánuð að ráða? spyr Hanna Björg Vilhjálmsdóttir, kennari við skólann.

„Þetta er lítilsvirðandi framkoma stjórnvalda til okkar. Það er það sem við upplifun. Og við erum eiginlega bara steinhissa og ég held að það séu allir steinhissa á þessu máli,“ bætir hún við.

Það sem flækir málið er að á meðal umsækjenda um starfið er starfsmaður mennta- og menningarmálaráðuneytisins, Ársæll Guðmundsson. Af þeirri ástæðu var ákveðið að Illugi Gunnarsson, mennta- og menningarmálaráðherra, myndi ekki ráða í starfið heldur yrði Ólöfu Nordal innanríkisráðherra falið það.

„Þetta er orðin eins og heit kartafla og komið í innanríkisráðuneytið þar sem við vitum að ráðherrann hefur verið í veikindaleyfi,“ segir Hanna Björg Vilhjálmsdóttir.

Ingi Bogi Bogason, aðstoðarskólameistari og einn umsækjenda um stafið, tekur þó ekki eins djúpt í árinni og Hanna Björg.

„Ég vil nú ekki segja að það sé kurr. En menn bíða eftir þessu og skilja ekki hvað tefur. Það er búið að fullvissa mig um að þetta muni skýrast innan tíðar og í sjálfu sér hefur þetta ekki stór áhrif á starfsemina. Við erum hérna á tiltekinni siglingu sem er samkvæmt skipulagi ársins forákvörðuð og það gengur vel,“ segir hann.

Samkvæmt auglýsingu átti að vera búið að ráða í starfið 1. apríl síðastliðinn en Bryndís Sigurjónsdóttir, fyrrverandi skólameistari, lét af störfum mánaðamótin mars/apríl. Hefur aðstoðarskólameistari gegnt stöðu skólameistara frá þeim tíma. Umsóknarfrestur um stöðuna rann út 2. febrúar og sóttu tíu manns um stöðuna, þrjár konur og sjö karlar.

Þessi grein birtist fyrst í Fréttablaðinu þann 7. maí