Besti fótboltamaður heims er ekki einn af þremur verðmætustu leikmönnum heims

Cristiano Ronaldo, sem hreppti Gullboltann í gærkvöldi sem besti leikmaður heims, er ekki einn af þremur verðmætustu leikmönnum heims samkvæmt úttekt franska fótboltatímaritsins France Football.

Þetta sama virta og risastóra fótboltarit heldur utan um afhendingu Gullboltans en úttektin kom út degi áður en Ronaldo fékk hann í fjórða sinn í gærkvöldi.

Sjá einnig:Ronaldo fékk rúmlega helmingi fleiri atkvæði en Messi

Úttektin byggist á því að lagt er kaupverð á bestu leikmenn heims en verðið er metið út frá hlutum eins og hæfileikum, aldri, leikstöðu á vellinum og hversu frægur leikmaðurinn er um allan heim. France Football fær sérfræðinga hvaðan æfa að úr heiminum til að hjálpa sér við gerð þessarar úttektar.

Samkvæmt úttekt France Football þetta árið er Neymar langverðmætasti leikmaður heims en hann er metinn á 250 milljónir evra. Samherji hans hjá Barcelona, Lionel Messi, fimmfaldur handhafi Gullboltans, er í öðru sæti en hann er metinn á 190 milljónir evra.

Frakkinn Antoine Griezmann, leikmaður Atlético Madrid, er í þriðja sæti metinn á 135 milljónir evra og Cristiano Ronaldo er fjórði á listanum. Portúgalinn er metinn á 130 milljónir evra.

Á eftir Ronaldo kemur svo Paul Pogba (120 milljónir evra), Gareth Bale (110 milljónir evra), Luis Suárez (95 milljónir evra), Sergio Agüeru (88 milljónir evra), Gonzalo Higuaín (85 milljónir evra) og Thomas Müller (82 milljónir evra).

„Verðmætustu leikmennirnir eru vanalega framherjar sem geta búið til eitthvað ótrúlegt eða skorað mörk. Leikmenn eins og Antoine Griezmann og Karim Benzema verða alltaf verðmætari en Raphaël Varane eða Hugo Lloris,“ segir Stephane Courbis, umboðsmaður sem er til dæmis með Laurent Koscielny á mála hjá sér.

Fimmtíu leikmenn eru í heildina á listanum en þar á Real Madrid flesta eða átta talsins. Enska úrvalsdeildina á flesta leikmennina af stærstu deildum heims eða 18 en spænska 1. deildin kemur þar næst með 16 leikmenn.