Ákærður fyrir sérstaklega hættulega líkamsárás við Súpuvagninn

Héraðssaksóknari hefur ákært karlmann á fertugsaldri fyrir sérstaklega hættulega líkamsárás við Súpuvagninn á Lækjartorgi í október 2014. Samkvæmt ákæru réðst maðurinn þá á annan mann, sem einnig er á fertugsaldri, og kýldi hann einu hnefahöggi í andlitið.

Við það féll maðurinn í götuna og þá sparkaði ákærði einu höggi í höfuð hans. Hlaut maðurinn mar hægra megin á höfuð fyrir ofan gagnauga og niður á neðri kjálka auk skurðar á neðri vör að því er segir í ákæru.

Maðurinn sem ráðist var á fer fram á eina milljón króna í skaðabætur.