Skyldu­bundnar getnaðar­varnir sendar aftur á lægra dóm­stig

Hæstiréttur Bandaríkjanna heimvísaði í dag máli Zubik gegn Burwell. Málið, sem snýst um hvort það brjóti gegn trúfrelsi atvinnurekenda að þurfa að tryggja starfsfólki sínu getnaðarvarnir, verður því tekið fyrir á ný á lægra dómsstigi. Þetta kemur fram hjá Reuters.

Hæstaréttardómarar Bandaríkjanna eru sem stendur aðeins átta talsins eftir að Antonin Scalia lést í febrúar. Barack Obama hefur tilnefnt Merrick Garland sem eftirmann Scalia við réttinn en hefur ekki enn hlotið samþykki þingsins fyrir þeirri skipan. Líklegt er því að mörg hitamál geti fallið á jöfnu á meðan frjálslyndir og íhaldssamir dómarar eru jafnmargir.

Lögin sem deilt var um hvort brytu gegn stjórnarskrárvörðum réttindum eru hluti af heilbrigðislöggjöf Barack Obama, „Obamacare“. Þau kveða á um að getnaðarvarnarpillur til kvenna skuli vera hluti af sjúkratryggingum sem vinnuveitanda beri að standa straum af. Löggjöfin mætti andspyrnu af hálfu ýmissa kaþólikka sem sögðu þessa háttan mála brjóta á trúarskoðunum sínum.

Í stað þess að taka afgerandi af skarið var það niðurstaða hæstaréttar að vísa málinu til baka.