Landsnet með í stórri rannsókn

Landsnet er meðal þátttakenda í evrópska rannsóknarverkefninu MIGRATE sem hlotið hefur um 2,5 milljarða króna [17 milljónir evra] styrk úr Horizon 2020 rammaáætlun Evrópusambandsins fyrir rannsóknir og nýsköpun. Verkefninu var hleypt formlega af stokkunum í vikunni og er vonast til að það skili niðurstöðum sem hjálpi til við að tryggja stöðugleika raforkukerfa eftir því sem endurnýjanlegum orkugjöfum fjölgar sem tengdir eru við þau.

MIGRATE-rannsóknarverkefnið stendur yfir næstu fjögur árin og eru þátttakendur alls 24 talsins frá tólf löndum. Auk Landsnets taka tíu önnur raforkuflutningsfyrirtæki í Evrópu þátt, ásamt sjö háskólum og nokkrum rannsóknarstofnunum og birgjum.

Verkefnið skapar um 150 ársverk en heildarkostnaður við það er áætlaður um 18 milljónir evra. Rúmlega ein milljón evra kemur frá stjórnvöldum í Sviss.