Telur menn féfletta á kampavínsklúbbum

Þorsteinn Sæmundsson, þingmaður Framsóknarflokksins, hefur verulegar áhyggjur af kampavínsklúbbunum svokölluð eða súlustöðum og telur sig hafa rökstuddan grun um að þar sé ýmislegt vafasamt í gangi.

„Ég hef lengi haft áhyggjur af rekstri svokallaðra kampavínsklúbba og súlustaða margra hluta vegna. Ég hef haft spurnir af því að menn hafi verið féflettir á slíkum stöðum,“ segir Þorsteinn og bendir reyndar á að slíkt tilvik hafi komið fram í fréttum í síðustu viku.

„Einnig hef ég nokkurn áhuga á stöðu starfsfólks þessara staða auk annars. Svarið bendir til að áhyggjur mínar hafi átt rétt á sér. Ég hef því í hyggju að óska eftir sérstakri umræðu um þessi mál. Vonandi verður hægt að koma henni á sem fyrst.“

Þorsteinn lagði fram fyrirspurn til innanríkisráðherra nýverið þar sem hann spurði hversu mörg tilvik sem tengjast starfsemi kampavínsklúbba hafi verið skráð í dagbók lögreglu á árunum 2011-2015, hversu mörg tilvik væri um að ræða og hvort þau hafi leitt til rannsóknar lögreglu. Ef svo, hverjar hafa lyktir rannsókna orðið og hvers eðlis eru þau tilvik.

Í svari kom fram að um væri að ræða 197 atvik, 61 brot voru skráð í málaskrá og fimm mál tengd kampavínsklúbbunum séu til rannsóknar hjá lögreglu. Sjá nánar hér.