Elsti íbúi Suðurlands er 104 ára í dag

Ingigerður Þórðardóttir frá Reykjum á Skeiðum fagnar 104 ára afmæli sínu í dag en hún er elsti núlifandi íbúinn á Suðurlandi. Hún er í fjórða sæti yfir elstu núlifandi Íslendingana, en nú eru 37 á lífi 100 ára og eldri.

Fjórir íbúar á Suðurlandi hafa náð hærri aldri en Ingigerður, þau Sólveig Pálsdóttir á Höfn í Hornafirði, sem varð 109 ára, Anna M. Franklínsdóttir á Selfossi sem varð 105 ára, Ingilaug Teitsdóttir í Fljótshlíð sem varð 104 ára og Guðrún Hallvarðsdóttir í Vestmannaeyjum sem varð 104 ára.

Ingigerður býr á Ljósheimum á Selfossi sem er öldrunardeild á vegum Heilbrigðisstofnunar Suðurlands. Hún er við nokkuð góða heilsu og lék á alls oddi í dag þegar börnin hennar þrjú og aðrir afkomendur heimsóttu hana í afmæliskaffi á Ljósheima.

Þangað mætti líka Herdís Gunnarsdóttir, forstjóri Heilbrigðisstofnunarinnar og afhenti Ingigerði blómvönd og konfektkassa í tilefni dagsins.

Maður Ingigerðar var Þorsteinn Bjarnason frá Hlemmiskeiði á Skeiðum en hann lést 2002.