Á jafnréttisráðstefnu með frægum leikkonum: "Búinn að uppfylla ákveðinn draum“

„Þetta var frekar ótrúleg upplifun,“ segir Tómas Gauti Jóhannson, 22 ára gamall nemi og varaformaður Stúdentaleikhússins, en á alþjóðlegum degi kvenna var hann viðstaddur HeForShe fund UN Women þar sem rætt var við Emmu Watson.

„Ég held ég hafi verið skotinn í Emmu síðan fyrsta Harry Potter myndin kom út og einhverntíman þegar ég var yngri setti ég það að hitta hana á lista yfir hluti sem ég yrði að gera áður en ég læt lífið. Nú hefur það gerst.“ Leikkonan Meghan Markle, sem er þekkt fyrir hlutverk sitt sem Rachel Zane í Suits þáttunum, var einnig meðal gesta fundarins.

Bjóst aldrei við að vinna

„Maður tekur svo ótrúlega oft þátt í svona leikjum og býst aldrei við því að vinna,“ segir Tómas. Hann hafði séð frétt hér á Vísi um málið og ákvað að slá til og sækja um að vera einn af þeim hundrað sem fengu að sitja fundinn.

Sjá einnig: Þú getur rætti við Emmu Watson um jafnrétti kynjanna

Á fimmtudaginn síðasta fékk hann póst frá UN Women. „Ég hélt þetta væri þessi týpíski höfnunarpóstur en neðst í honum stóð að mér væri boðið að taka þátt. Ég marglas þetta og bað kærustuna mína um að lesa þetta líka. Þá var ég í raun einn þeirra heppnu.“

Á fundinum voru samankomnir fulltrúar frá yfir tuttugu löndum sem allir eiga sameiginlegt að hafa lagt hönd á plóg í jafnréttisbaráttunni. Til að eiga möguleika á þátttöku þurfti fólk að skila inn fimmhundruð orða færslu um hvers vegna það ætti að fá að vera viðstatt fram yfir einhvern annan.

Stjórnvöld taki á hefndarklámi

„Ég sagði frá því að ég hefði kennt með jafningjafræðslunni þar sem ég fræddi menntaskólanema og ungt fólk um jafnréttisbaráttuna. Einnig taldi ég það til að ég væri varamaður í jafnréttisnefnd Seltjarnarness og áhyggjur mínar af hefndarklámi.“

Hann rifjar upp að þegar Emma Watson hélt ræðu á HeForShe ráðstefnu UN í fyrra hafi netníðingar á 4Chan hótað að leka af henni nektarmyndum en fyrir skemmstu opinberaði leikkonan það að hótanirnar hefðu hafist um klukkustund eftir að hún lauk máli sínu á ráðstefnuninni. Tómas bendir einnig á að á veraldarvefnum megi finna myndir af minnst hundruðum íslenskra kvenna sem verið er að dreifa gegn þeirra vilja.

„Þetta er svo ógeðslegt og fólk er svo varnarlaust gegn þessu. Stjórnvöld verða hreinlega að gera eitthvað til að taka betur á málum sem tengjast hefndarklámi.“

Bravo bravo @EmWatson What a way to celebrate #InternationalWomensDay with @UN_Women (@e_nyamayaro) #HeForShepic.twitter.com/6GksAgFzwt

— Meghan Markle (@meghanmarkle) March 8, 2015

Mátti ekki taka myndir

Fundurinn fór fram í höfuðstöðvum Facebook í London. Í upphafi var tekið stutt viðtal við Emmu og í kjölfarið svaraði hún nokkrum spurningum af Twitter og af vefnum. Í lokin fengu nokkrir áhorfendur í salnum séns á að spyrja leikkonuna að spurningu. Viðburðurinn var sýndur í beinni útsendingu á Facebook og er talið að ríflega milljón manns hafi fylgst með honum.

„Þetta var stærsti viðburður UN Women á konudeginum,“ segir Tómas. Þátttakendur hafi þurft að skrifa undir samning um að þeir myndu ekki mynda neitt meðan þeir væru staddir í höfuðstöðvum Facebook og að þeir myndu ekki ræða það sem þar bar fyrir augu. „Það er svolítið leiðinlegt að hafa ekki fengið mynd af sér með Emmu en þetta var engu að síður frábært.“

Tómasi gafst ekki kostur á að spyrja leikkonunar að neinu en hann hafði ætlað sér að spyrja út í hlut kvenna í kvikmydaiðnaðinum. Einnig langaði hann að fá að vita hvað henni þætti um hefndarklám.

Líkt og áður hefur verið nefnt er Tómas tengdur Stúdentaleikhúsinu. Fyrir áramót tók hann þátt í uppsetningu þess á Stundarfrið en þar lék hann mann sem kúgar konuna sína. „Þetta er mjög íronískt að í tveimur af síðustu þremur leikritum sem ég hef tekið þátt í þá hef ég leikið einhvern viðbjóð. Ég veit ekki hvað þetta er, kannski er ég að senda frá mér einhverja strauma í prufum en það er töluvert fjarri sannleikanum,“ segir Tómas að lokum.

Post by UN Women.