Dregur biskupa til ábyrgðar

Frans páfi hefur samþykkt stofnun sérstaks dómstóls til að fjalla um mál kaþólskra biskupa sem hafa haldið hlífiskildi yfir barnaníðingum í röðum presta.

Fyrir nokkrum árum kom upp hvert málið á fætur öðru innan kaþólsku kirkjunnar í Bandaríkjunum, á Írlandi, í Belgíu, á Ítalíu, í Þýskalandi og víðar, þar sem prestar höfðu framið kynferðisbrot gagnvart börnum en biskupar séð til þess að málin yrðu þögguð niður.

Á síðasta ári sætti Páfagarður harðri gagnrýni af hálfu Sameinuðu þjóðanna fyrir að taka ekki nægilega vel á þessum málum.