Safnar saman gullkornum frá börnum

Sverrir Björnsson sá eftir því að hafa ekki skrifað upp gullkorn frá eldri dóttur sinni, og eftir að hann fór að skrifa upp eftir þeirri yngri kviknaði hugmynd um vef til að safna saman gullkornum frá börnum.

„Ég á tvær dætur og sá alltaf eftir að hafa ekki skrifað upp eftir þeirri eldri. Ég byrjaði að skrifa upp eftir yngri dóttur minni, sniðugar setningar sem komu upp úr henni.“ segir Sverrir Björnsson.

Hann segist hafa farið að hugsa hvað hann gæti gert sniðugt með gullkornin og fannst hann þurfa að koma þessu á gott form. Í framhaldinu kviknaði hugmyndin að heimasíðunni Kidwits.net. 

Þar geta foreldar safnað saman gullkornum barna sinna, gert einfalt portrett af barninu og deilt snilldinni á Facebook.

„Öll börn segja eitthvað fyndið á tímabili, það er svo gaman að sjá hvernig þau takast á við að skilja heiminn og það verður bæði fyndið og mannlegt í senn,“ segir hann. Sverrir teiknar skopmyndir við gullkornin sem munu í framhaldinu birtast í blöðum og bókum.

Höfundarlaunin renna til Barnahjálpar Sameinuðu Þjóðanna. „Þetta er rétt að fara af stað,“ segir hann. 



Nokkur gullkorn af síðu Sverris, Kidswits.net:



Mamma þegar Michael Jackson dó, tók þá Páll Óskar við? - Henrik, 4

Eru ljón, tígrisdýr og tröll á Akureyri? - Óttar, 5

Má ég fá hund eða kött? Það eru til tíu tegundir og þeir þurfa engin batterí. - Sunneva, 3

Þegar maður deyr, þá fara beinin niður í jörðina. En húðin, hún fer upp til Guðs. - Þorbjörg, 4

„Mamma, ég er með glimmer í fætinum“ (Náladofa) - Katrín, 4

„Má ég núna horfa á ljóta mynd?“ (Hulda steig á vigtina og sá að hún var orðin 18 kíló) - Hulda, 4

Ég smakkaði kjúkling með Barbí-sósu. - Herdís, 9

Þegar Michael Jackson dó, tók þá Páll Óskar við? - Henrik, 4

„Pabbi viltu lesa passwordið?“ (réttir pabba sínum málsháttinn úr páskaegginu) - Hulda, 4

Hvaða guð fæddist á sumardaginn fyrsta? - Elísabet, 5

„Mér er svo rosalega illt í eyrunum!“ (Skyndilega glaðnar yfir henni.) „Er ég kannski að fá göt í eyrun?“ - Sunneva, 4

Í Lækjargötu við styttuna af Kristjáni konungi X að rétta Íslendingum stjórnarskrá. „Af hverju er maðurinn með fjarstýringu, hverju er hann að reyna að stjórna?“ - Sunneva, 3

Það er beinagrind inní mér ... og ég er ekkert hræddur við hana! - Ari, 4