Símtalið frá Loga nær orðrétt í textanum

Lag rapparans Emmsjé Gauta og Friðriks Dórs, sem ber titilinn Í kvöld, hefur vakið mikla athygli síðan það kom út í fyrradag. Textinn við lagið, sem saminn er af Gauta sjálfum, er opinskár og er rapparinn ákaflega hreinskilinn í laginu. „Þegar ég sem suma textana mína þarf ég að leggja þá frá mér í ákveðinn tíma og svo endurskrifa þá. En í þessu lagi settist ég bara niður og skrifaði. Ég ákvað að vera hreinskilinn og tala ekkert undir rós,“ segir Gauti Þeyr Másson.

Sérstaka athygli vekur að í miðju laginu byrjar sími að hringja. Í textanum segir Gauti þá frá símtali frá Loga Pedro Stefánssyni tónlistarmanni, þar sem sá síðarnefndi réð Gauta heilt um samskipti við konur: „Logi hringdi í mig og sagði: Slakaðu á. Talandi um mig og mínar kvennafarir. Blóðpumpan er heil og þolir bara smá. Eyðileggur hana og þú endar aleinn.“

Gauti segir að eins og annað í laginu hafi símtalið gerst í alvöru og að hann hafi allt nánast orðrétt eftir vini sínum. „Já, Logi hringdi í mig,“ staðfestir Gauti eftir spurningu blaðamanns og bætir við: „Það er ótrúlega gott að eiga vini sem eru svona hreinskilnir.“

Logi Pedro segist sjálfur muna vel eftir símtalinu. „Já, ég man mjög skýrt eftir þessu, þó svo að ég fari ekki út í hvað ég sagði nákvæmlega. Þetta voru bara tveir góðir vinir að tala saman. Ég held að við getum þó öll viðurkennt að við höfum lent á villigötum í hjartamálum,“ útskýrir Logi.

Textinn í laginu fjallar um daglegt líf rapparans og þá nánd sem starfsvettvangurinn skapar við skemmtanalífið. Þar leynast ýmsar freistingar. „Lagið er ekki uppgjör af neinu tagi. Þetta er bara ég að segja hvernig lífið mitt var á þeim tímapunkti sem textinn var saminn. Þetta er ég að koma til dyranna eins og ég er klæddur.“

Myndbandinu við lagið hefur verið vel tekið, en hægt er að horfa á það á YouTube. Því er leikstýrt af Frey Árnasyni fyrir Tjarnagötuna. Lagið verður á væntanlegri plötu Emmsjé Gauta, sem ber titilinn Vagg & Velta.